Thai Mungdan De Wa Sarabyin Francis Du Nga Sai

Maigan Mungdan ni de sa du gawan ai 32 lang ngu na hkrun lam hku nna Asia dan de sa du gawan nga ai Wa Sarabyin Francis gaw dai ni Thai Mungdan de du shang wa sai rai nga ai.

Wa Sarabyin hte shi a salung sala ni, shiga la ai masha ni marai 70 ram jawn lawm ai nbungli gaw, Bangkok na Don Muang Nbungli daru hta shani 12:00PM ten ram hta du shang wa ai rai nna, Thai Hkawhkam a dat kasa hte Asuya Ningbaw ni, Thai Saradaw wuhpung ni hte Saradaw Ginwang dat kasa ma marai 11 hte rau mung shawa masha ni hkap tau hkalum la ma ai.

Asia Mungdan ni de (4) lang ngu na  Thai hte Japan Mungdan ni de sa du ai Wa Sarabyin Francis a ndai lang na hkrun lam gaw, Kahtawlik Nawku hpung masha n law ai Thai hte Japan Mungdan hta sasana magam bungli galaw ai lam grau nna rawt jat wa lu na matu, Makam masham nbung ai  ni a lapran kanawn mazum simsa ai lam galaw lu na matu hte tara n shang masha dut hpaga galaw ai lam, Mungdan simsa ngwi pyaw lam galaw ai hta mahkrai shatai  tsun ginlen ai lam ni galaw na matu yaw shada let du sa wa ai rai nga ai.

Asak 82 ning re sai Wa Sarabyin gaw Thai Mungdan hta masum ya nga ai ten Thai Buddah Saradaw Kaba ni, Thai Mungdan Asuya ningbaw ni, Thai Mungdan na Saradaw wuhpung ni hte hkrum nna ndai shara hkan hkrum katut nga ai mayak lam ni hpe tsun jahta jahkrup bawngban mat wa na re lam chye lu ai

November praw 21 ya, bat mali ya shani Thai Mungdan Asuya Rung kawn tara shang hkap hkalum ai lam galaw nna, Thai Mungdan hkringmang daju Prayuth Chan-ocha hte laksan hkrum ai hpang asuya hte seng ai magam gun ni hpe Mungga tsun  shaga na re lam, dai hpang Wat Ratchabophit Sathit Maha Simaram bawnggyi jawng de sa nna Buddha Saradaw kaba ni hte hkrum shaga na re lam chye lu ai.

Bangkok Mare kaw 1898 ning hta Kahtawlik Nawku hpung kawn hpaw tawn da ai St.Louis Tsi Rung magam gun ni hte machyi masha ni hpe sa gawan ai lam hpe mung Wa Sarabyin galaw na rai nna, Thai Hkawhkam Maha Vajiralongkorn Rama X hte mung laksan hkrum shaga na re lam chye lu ai.

Shana de hkying 6:00PM ten Mungdan Ginsup Pa hta Shawa Missa nawng jau ya na rai nna November 22 ya, bat 5 ya shani Thai Mungdan Saradaw wuhpung hte kaga makam masham hpung ni, Sasana galaw nga ai hpung Sara ni hpe mungga shaga ai lamang, FABC Asia Mungdan Saradaw Wuhpung ni hte hkrum shaga ai lam ni hpe galaw nna shana de 5:00PM ten Assumption Cathedral Nawku Jawng kaba hta Ramma ni hte Missa hkungga nawng jau ai lam galaw mat na re lam chye lu ai.

Wa Sarabyin Thai Mungdan du nga ai laman , shi  kaji ai shaloi na manang, Thai Mungdan na Jawng ni kaw 50 ning ram magam gun nga sai, Wa Sarabyin a kahkri daw ang ai 77 ning rai sai Mama Ana Rosa Sivori hku nna ga gale ya na re lam chye lu ai.

Ref: Bangkok Post, Vatican News, Reuters

Thomas