Tara Shang Dinghku Hka Bra Lam Galaw Lu Na Upadi Shagrin Lu Hkra Philippines Mungdan Lahta Rap Daw Hta Bawng

Mungdan Ram Daw Hta Dinghku Hka Bra Mai Na Upadi Hpe Bawngban

Philippines Mungdan hta, dinghku hka bra lam hpe tara shang galaw lu na upadi shagrin lu hkra Mungdan lahta rap daw salang ni bawng ban lam bai galaw wa nga ma ai majaw dai lam hpe ning hkap ai lam Philippines Mungdan Saradaw ni kahtap nna September shata 17 ya shani bai tsun shapraw dat nga ma ai.

 Lai wa sai shata kru daram hta mung ndai lam hpe Mungdan a lawu rap daw hta bang ban lam galaw ai majaw Saradaw ni kaw nna ja ja ning hkap lam galaw lai wa masai ai rai nga ai.

 “Mungdan a lahta rapdaw salang ni hku nna, ding hku ni tara shang hka bra lu mai na tara upadi hpe madi shadaw na masa gaw nnga ai, raitim mung n-awng ai hkungran lam ngu nna ndau masat ya mai lu na upadi hpe gaw rap daw salang ni ra sharawng na masa nga ai” nga nna Philippines  Mungdan lahta rap daw salang ning baw Vicente Sotto tsun dat nga ai lam  Ucan shiga dap kaw nna ka shana da ai lam nga nga ai.

Ding hku kata laja lana lata du adup abyen hkat ai, tsa chyru nang hpam malu masha ya tai nna ding hku hta mang hkang kaba shabyin ai, hpaida chyu da nna nga ai, tinang a ningrum ningtau ntsa sadi ndung ai, num shalaw la shalaw nna nga ai, num shada la shada ganawn nna nga ai, ndai zawn re ai masa ni hpe hparan ya na lam ngu mahta nna ya na zawn tara shang dinghku ni hka bra lu mai na upadi shagrin lu hkra Philippines Mungdan lahta rapdaw hta bawng ban lam byin pru wa ai re, nga ai.

Ndai lam hte seng nna Philippines Mungdan Kahtawlik Saradaw rapdaw tsun shaga lit hkam Jau kaba Jerome Secillano tsun ai hta gaw “kun dinghku hka bra lam ngu ai gaw hkungran lam hte kun dinghku hpe jahten sharun ai lam rai nga ai majaw kun dinghku hka bra mai na upadi hpe Nawku hpung galoi mung ning hkap ai, kun dinghku hka bra shangun lu mai ai upadi hku nna, hkungran lam, kun dinghku hte kashu kasha ma ni hpe mai kaja ai lam akyu jaw ai lam galoi nbyin pru shangun lu mai ai, dai re majaw Mungdan rap daw salang ni hku nna byin pru wa ai mang hkang langai hpra hpe madi nna hparan ahkyak la ai masa she myit ra na re” nga nna tsun dat nga ai.

Philippines Mungdan gaw tara shang dinghku hka bra lu mai ai upadi nnga ai langai sha re ai mungkan mungdan rai 

Vatican City ngu ai Vatican Mungdan hta lai nna Philippines Mungdan gaw tara shang dinghku hka bra lu mai ai upadi nnga ai langai sha re ai mungkan mungdan rai nga ai, raitim mung 2017 ning hta galaw lai wa ai sawk sagawn sumtang laika hta Philippines Mungdan masha malawng maga gaw ndai dinghku tara shang hka bra lu mai na tara upadi nga wa na hpe madi shadaw jat wa ai masa nga nga ai, nga nna Ucan shiga dap shiga hta ka shana da ai hpe mu lu nga ai.       

Source : ucannews.com