Tara Sakse Ni Hpe Myit Dum Lam Dingda Korea Mungdan Hta Galaw Nga Ai Shiga

Dingda Korea mungdan hta, September shata hpe, Asia dan sinpraw maga daw hta Kahtawlik makam masham chyam bra wa hkra asak ap nawng shakut shaja lai wa sai Tara Sakse ni hpe laksan myit dum ai shata ngu nna masat da ai the maren, Tara Sakse ni hpe myit dum akyu hpyi ai lam Korea mungdan hta galaw nga ma ai rai nga ai.

Ucan shiga dap kaw nna ka shana da ai shaiga ni hta, tara a matu sak kau hkrum lai wa sai Korea myu sha San pra ai Andrew Kim Tae-gon, San pra ai Paul Chung, bai shan hte rau sat kau hkrum lai wa sai  tara sakse ni yawng a poi Missa hkugga hpe “Seosomun” ngu ai nawku htingnu hta Sept 22 ya shani Saradaw daw ni woi awn nna Missa hkungga nawng ya lam galaw lai wa ma ai re, nga ai.

Korea mungdan hta Kahtawlik makam masham chyam bra wa hkra asak ap nawng lai wa sai San pra ai Tara Sakse ni marai 103 nga nga ai the, kadai nchye dat ai sha makam masham a matu tinang a asak hpe ap nang lai wa sai tara sakse ni mung law law nga nga ai. Tsa ban 19, 1839 ning grup yin, Joseon hkaw hkam prat hta, Korea mungdan hpung masha ni zingri zingrat na chying hkrum lai wa ma ai the, dai shaning ni laman hta hpung masha ni 8,000 the 10,000 grup yin sat kau hkrum lai wa ai re nga ai. Dai ni hta na marai 103 hpe Wa sarabyin Yawhan Pawlu II kaw nna 1984 ning hta San pra ai masha dang da lai wa sai rai nga ai. Bai 2014 ning hta Wa sarabyin Francis hku nna mung Korea mungdan hta tara a matu sak kau hkrum lai wa sai kaga marai 124 hpe mung Alu ai masha ngu nna sharawt dang da sai rai nga ai. Bai tsa ban 20 ning laman byin lai wa ai Korea mungdan majan laman hta mung Communist ni a lata hta sat kau hkrum lai wa ai hpung masha  ni law law naw nga nga ma ai majaw matut nna san pra ai masha dang da hkrum na Korea tara sakse ni law law naw nga nga ai. Ndai tara sakse ni yawng hpe myit dum lam galaw na matu September shata hpe Korea mungdan hta Tara Sakse ni hpe myit dum ai shata ngu nna masat galaw nga ai lam rai nga ai.

Shaning 100 ning jan zingri zingrat lam ni law law hkrum lai wa ai the, Tara sakse ni law law a asak ap nawng nna gaw de da ai Dingda Korea Kahtawlik nawku hpung gaw, dai ni na aten, Kahtawlik hpung masha ni wan 6 jan rai nga sai, jau ni 6,000 jan, sasana magam gun nga ai Ma ma, Brother ni 12,000 jan nga sai sha n ga, makam masham lu la ai prat asak naw kaji nga ai raitim, ngang kang ai nawku hpung, n gun kaba the shamu shamawt nga ai nawku hpung, Asia dan sasana a matu ahkyak ai nawku hpung hku nna dai ni Korea mungdan Kahtawlik nawku hpung tsap nga sai rai nga ai.    

Source -Ucan News