Syria Mungdan Dingdung Sinpraw Maga Byin Nga Ai Majan Mang Hkang Hpe Jahkrum Bawng Ban nna Ran Hparan Lam Galaw Na Matu Wa Sarabyin Tsun Lajin Dat Nga Ai Shiga

Syria mungdan Ding dung Sinpraw maga ndai laman byin pru nga ai majan mang hkang hpe jahkrum bawng ban nna mahtai tam ran hparan lam galaw na matu Wa sarabyin Francis kaw nna tsun lajin lam galaw dat nga ai.

“Syria mungdan Dingdung Sinpraw maga hta ya ya byin pru nga ai kasat gala majan mang hkang lam the seng nna, dai mang hkang hta shang lawm nga ai uhpung ni yawng kaw nna mung, mungkan mungdan  ning baw ni hku nna mung, myit san seng ai myit, mying malang ai myit ni the asan brang lang tsun shaga bawng ban ai lam ni galaw nna mai kaja ai mahtai ni shapraw daw dan la lu hkra tsun shaga bawng ban lam ni galaw ga” nga nna lai wa sai laban shani kahtap tsun lajin lam Wa sarabyin Fracis galaw dat nga ai. San Peter pa kaba hta du hpawng nga ai shawa hpawng kaba hpe shani ka-ang Angelus akyu hpyi woi ngut ai hpang lahta na zawn Wa sarabyin tsun dat ai lam rai nga ai.

Matut nna wa sarabyin tsun ai hta, “Asia Sinpraw ka-ang hta, grau nna masha law law si hkrum lam byin nga ai Syria mungdan hta kasat gala majan bai byin nna mungchying mung shawa masha ni law law tinang a buga dum nta ni kaw nna hprawng pru wa ra ma ai shiga ni bai na lu nga ai, hprawng pru wa ai masha ni hta Hkristian kum dinghku masha ni mung law law lawm nga ma ai” nga nna Wa sarabyin tsun dat nga ai.       

Syria mungdan Dingdung Sinpraw maga hta dap jung nna nga ai “Kurdish-Syrian Democratic Forces” ngu ai Kurdish myu sha Syria Democratic hpyen hpung hpe Turky mungdan hpyen hpung ni kaw nna Syria mungdan jarit laidi let shang kasat lam ni galaw wa ai majaw dai ginra hta ndai laman majan laja lana byin nga ai rai nga ai. Ya na zawn mungdan jarit laidi nna Turky hpyen hpung ni shang kasat majn baw lam galaw nga ai ndai laban shani hta nhtoi 5 ya rai nga sai rai nga ai. Majan a majaw mungchying sha ni nlaw htum marai 50 jan si hkrum lai wa masai the, kaga masha 130,000 ja mung tinang a buga dum nta kaw nna hprawng pru nga mat wa masai rai nga ai, nga nna Vatican shiga dap kaw nna shana dat nga ai.      

Sourve - Vatican News

#churchnews #rvakachinservice