Soviet Up Hkang Ai Npu, Makam Masham A Majaw Sat Hkrum Ai Ukraine Wa Jau Petro Paolo Oros hpe A Lu Ai Masha Tang Na

August 5, bat manga ya shani, Vatican Shiga Dap kaw nna ndau shana ya ai shiga hta, 1953, August 28 ya nhtoi hta, makam masham a majaw sat hkrum ai Ukraine Jau, Fr. Petro Paolo Oros, hpe Wa Sarabyin Francis, Alu Ai Masha Tang na matu hkyen lajang nga ai lam lawm wa ai.

Wa Jau Petro Paolo Oros hte rau marai manga hpe Nawku Hpung gaw shagrau sha-a, matsing masat masa galaw da ai lam Wa Sarabyin Francis tsun shana da ai. Dai ni hta Vittorio Coelho de Almeida (the director of Radio Aparecida) hte Capuchin Umile da Genova (Sorriso Francescano hpe gaw de hpang ai wa) mung lawm ma ai lam chye lu ai.

Wa Jau Oros a labau kadun

Hungarian masha ni a mare, Biri na Hkristan kun dinghku langai kaw na rai nna, 14 July 1917 hta shangai chyinghkai wa ai.

Kawa gaw Greek Kahtawlik Jau rai nna Petro lahkawng ning sha naw rai yang n nga mat ai. Asak 9 ning sha naw rai yang kanu mung si shakram kau da ai hkrum lai wa ai.

1937 hta, Ukraine hte Hungary lamu ga jarit, Transcarpathia na Uzghorod hta hpaw da ai Jau Tai Jawng kaw shang nna hpaji sharin la ai.

1942, June 18 hta Greek-Catholic Eparchy of Mukachevo, Ukraine, Jau tai wa nna, ginwang langai kaw ningtau jau hku lit magam gun let matsan mayan ni hpe tsaw ra myit kaba hte yu lakawn lai wa ai.

1943 hta gaw, majan a laja lana byin ai majaw, Slovakia a ginjaw mare kaba Kosice hte ni ai Barca kaw na hpyen dap hta chaplains hku nna lit gun hpai ai. 1944 shaning htum maga de Jau ginwang de bai htang wa ai.

Dai ten gaw Transcarpathia ginra ting gaw Red Army hte Ukrainian Soviet Socialist Republic a npu kaw rai mat sai rai nga ai. Dai hpang gaw mungdan 15 hpe Union of Soviet Socialist Republics (USSR) mying hte up hkang ai munghpawng mungdan tai wa ai rai nga ai.

1946 hta, Wa Jau Oros gaw Irshava mungdaw na Bilky Jau Ginwang a ginwang up jau lit magam hpe gun hpai hpang ai.

Dai ten kaw nna 1948 du hkra, Russain Orthodox Nawku Hpung de gale shang wa na matu shadut hkrum lai wa ai. Wa Jau gaw Wa Sarabyin hte matut mahkai ai Greek Catholic Jau hku sha matut nga lai wa ai.

1949 shaning hta gaw Greek Catholic nawku jawng ni yawng pat jahkring da hkrum hpang wa ai. Wa Jau Oros gaw n tara ai hku rim la hkrum ai ni hte nawku hpung masha ni hpe makawp maga ya nga ai rai nga ai.

1953 shaning hta Wa Jau Oros hpe rim ahkang na matu Soviet Asuya kawn ndau laika shapraw ai majaw, yen hkawm na matu naw shakut ai raitim, balik ni Siltse na wanlen lam hta rim nna sat kau ma ai rai nga ai.

Wa Jau Oros a hkum tsawp gaw Soviet Union ga karan mat ai ten du hkra shi hpe sat kau ni a lata naw makoi da ma ai, nga nna mung shiga nga lai wa ai lam chye lu ai.

Wa Jau Petro Oros hte rau masat masa galaw shagrau hkrum ai masha manga naw nga ai rai nna, dai ni gaw Jesus Antonio Gomez Gomez (Columbanian Jau), Capuchin Umile da Genova (Sorriso Francescano hpe gaw de hpang ai wa), Vittorio Coelho de Almeida (the director of Radio Aparecida), Giovanni Sanchez Hernandez (Spanish Jau), Maria Celina Kannanaikal (Indian Ursuline MaMa) ni rai ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/ukrainian-priest-martyred-under-the-soviet-communist-regime-to.html