Sinhpuni ( Symphony ) langai hta nga ai jawm hpawng lam masha shagu hta nsen nga ai

Lai wa sai lahkawng ya shani na zawn sha Asia Dan ting hte seng ai sasana nawku hpung Rapdaw Zuphpawng Kaba a masum ngu na hte hpang jahtum shani gaw Chyoi Pra ai  Wenyi Karai Kasang kaw akyu hpyi ai lam ( Adsumus sancte Spirtus) hte hpang lai wa sai rai nga ai.

Daini na matu ninghtan shinggyin salang gaw Philiphine mungdan Kahtawlik Saradaw wuhpung ningbaw Kalo Ukan Saradaw Sasana lit hkam Sagu rem wa, Wa  Saradaw Pablo Divid, Miwa gumsan mungdan hte seng ai Kahtawlik Saradaw Wuhpung kaw na Miss Teresa Wui, Asia Dan hte seng ai Saradaw wuhpung a Karai lam hte seng ai commision rung a mu gun amu madu, Asia Dan Kahtawlik Saradaw ni a Sasana hte seng ai Rapdaw Zuphpawng hte seng ai magam gun hpung ( FABC Synod Task Force)  kaw na Miss Eestela Padila ni rai nga ai.

Dat kasa ni gaw shanhte myit hte salum hta dan dawng nga ai lahkawng ngu na shani a mabyin lam hte seng nna shanhte a ningmu ni hpe shanhte a wuhpung kata hta  gam garan ai lam galaw lai wa sai.

Relator General of the XVI Ordinary General Assembly of the Synod of Bishops, Luzinbaw (Luxembour) Saradaw Sasana Sagu rem wa, Wa Saradaw kaba Cardinal Jean-Claude Cardinal Hollerich SJ kaw nna dat kasa ni hpe lam masum hpe ningshawng da tsun lai wa sai.

Shingni madum sumpyi hpe ga shadawn tawn nna dat kasa ni langai hpra hpe  madum sumpyi langai zawn rai nna dai madum sumpyi hpe myit hkrum myit ra lam rai nga ai sinhpuni ( symphony)  langai byin na matu myit hkrum myit ra gahkyin gumdin let galaw gring ai hpe Wa Saradaw kaba Cardinal Hollerich kaw nna shawng nnan sanglang lai wa sai.  Dai hta n-ga nsen nrum (nhkrum) ai lam de ndu na matu kaga masha ni, madum sumpyi hte htap htuk ai rit kawp tara hte hkrak law law lang galaw ra ai. Lahkawng ngu na hku nna Wa Saradaw kaba Cardinal Hollerich kaw nna rau sha hkrun lam hkawm ai hta shagrit shanem ra ai lam,shagrit shanem ai hta sha galaw lu ai rai nna ndai hkrun lam hpe rau sha hkawm lu na re lam hpe tsun lai wa sai.

Hpang jahtum hta Wa Saradaw kaba Cardinal Hollerich gaw rau sha hkrun lam hkawm nga ai nawku hpung gaw kabu gara shiga hpe hkaw tsun ndau na hte Karai Kasang a masha ni yawng a matu tingyeng myit n myit ai sha magam gun na matu Madu Yesu shangun dat ai Sasana Nawku hpung re lam hpe madung da tsun lai wa sai.

Dai hpang, tsun shadum ai hte, npawt e tang madun wuhpung kaw na malawm, Fr. Clarence Devadass gaw, jahtum laika a lajang da ai hkrang a dan dawng ai lam yan nkau hte, dat kasa ni kaw na hpaji jaw da ai, gram lajang lam ni lawm ai magam bungli masa lam ni hpe, tang madun lai wa ai, wuhpung ni a kata, wenyi hte seng ai tsun shaga lam a matu tau hkyen lajang ai hku nna, dat kasa ni hpe azim sha sawn dinglik yu na matu tsun lai wa ai.

Shani daw na zuphpawng hta, dat kasa ni gaw, Asia Dan hta nga ai, Hkristan Sasana ni: rau jawm mahkri shawn hkrun lam langai hta rau hkawm sa lu na lam hpe shatsaw na matu, gara Nawku Hpung hte seng ai hkang da lam ni hpe galai shai na ( sh)  gin shalat na matu, ra kadawn nga ai kun?  Ngu ai ga san hte, dat kasa ni gaw 2023 ning October zuphpawng hte 2024 ning October shata, Kahtawlik Sasan ting hte seng ai Rapdaw zuphpawng lapran byin shangun mayu ai lam yan ni,  gara wa re ngu ai ga san ( 2 ) hpe, bai sawn dinglik yu lai wa sai mung rai nga ai.  Dai hpang dat kasa ni gaw, Asia Dan madang, Rapdaw ginchyum dat tang madun laika a, jahtum na lam hte seng nna, shanhte ni a jahtum ningmu ni hpe, garan gachyan ngut ai hpang, azim sha nga let, aten la akyu hpyi la lu saga ai rai nga ai.

Ginchyum dat htuk shapraw ai hta, Kahtawlik Sasana ting hte seng ai Saradaw kaba ni a, Amu madu Mario Cardinal Grech kaw na, dat kasa ni hpe ( 3 ) ya na ai Asia dan madang rapdaw zuphpanwg hta shi a mu mada lam ni hpe, garan gachyan lai wa nna, ndai zuphpawng hkrun lam gaw, Akyu ara grai nga ai lam hte, ya na zawn shang lawm ya ai lam hta, Kahtawlik Sasana hku nna, malap na nrai sai lam hkam daga jaw dat lu ai lam hpe mung tsun lai wa sai re,

Asia Dan Saradaw ni a Amu madu rai nga ai, Kikuchi gaw, Asia Dan madang Rapdaw Zuphpawng awng dang ai lam hkrak jaw na matu, shang lawm ya ai ni yawng hpe, chyeju dum dat ai lam hte, masat shagrau ai lam tsun shaga let, tup hkrak sindan pa jaw bang dat sai mung rai nga ga ai.

Asia Dan madang, Rapdaw Zuphpawng a ginchyum dat Missa Hkungga hpe,Asia Dan Saradaw ni a ningbaw, Yangon Saradaw Sasana a Saradaw kaba Cardinal Charles Bo, Bangkok Saradaw Sasana a Saradaw kaba, Francis Xavier Kriengsak Kovitvanit, India Mungdan na Saradaw Kaba Cardinal George Cardinal Alencherry Major Archbishop Of Ernakulam - Angamaly ( Syro - Malabar)  hte dingda Korea mungdan Suwan na Saradaw Kaba Mathias Ri Long - hoon ( Lee Yong-Hoon) ni kaw na woi awn galaw sa wa ai rai nga ai.

Kahtawlik Nawku Hpung, Asia Dan a Rapdaw Zuphpawng hkrun lam gaw, Madu Yesu a zaibru jang hkrun lam hte bung nga ai re majaw, yawng a matu shingjawng ai lam rai nga tim, ra nan ra nga ai. Hpa majaw nga yang, ndai gaw Sasana a matu madat mara shangun ai, hkrum zup shangun ai hte numdaw hte numdaw chye ginhka ai magam bungli a marang e, Kabu Gara Mungga hpe grau nna sakse hkam lu na re lam Cardinal Kaba Charles Bo kawn shi a mungga hta tsun lai wa sai rai nga ai. Matut nna Saradaw kaba Chales Bo tsun ai hta anhte hkrum sha nga ai mayak lam ni hpe ninghkap dang ma-nga lu na matu anhte a myit masa ni hpe galai shai ra na lam tsun lai wa ai. Ndai zawn galai shai na matu gadun ai hku tsun ga nga jang, L.E.N.T ngu ai, ga si (4) hpe gam garan lai wa ai.

L =  Jahkrat kau ai(or) tat kau ai. Ndai rau hkawm sa ai lam lachyum nga na rai jang, ru jaw bang ya ai lam gaw, rawt jat galu kaba gan ga wa na matu tau nau ra ahkyak ai lam re majaw, ndai nauku hpung kawn rau hkawm sa ai hkrun lam byin tai wa ai kawn ninghkap ai lam yawng hpe myit maju njung ai sha tawn kau ai lam hpe chye na na matu hka ja ra na rai nga ai.

E =  Ahtawk hkra ai. Yesu Hkristu a hpang hkan nang ai hkrun lam hta hkawm sa ai ten hkrak tup teng man ai ban dung langai nga ai. Madu Yesu hpe mu hkrum na hte Wa Sarabyin Francis a si mani ai shingni hpe myit dum na matu rai nga ai. Shingrai, Mu ai sha n ga, sa gawan shaga ai, na ai sha nre, ta tut sa madat ya ai lam, masha ni a man de lai kau ai nre sha, shanhte hte rau hkring sa ai lam, “matsan masha ni, kaya jahpa ngu tsun na malai matsan dum ai myit hte shanhte hpe shara jaw, shamu shamawt shangun ai a marang e, Madu Yesu galaw lai wa sai lam ni hpe anhte bai hkan galaw ai lam gaw grai tsawm htap ai lam rai nga ai.

N = htingbu nta masha byin tai ai. Kaja ai Sanmaritan masha a ga shadawn gaw, anhte a htingbu gaw gadai rai ta ngu ai hpe ga san san da tai lam rai nga ai ( Lk 10;29 ) . hpang jahtum na shi gaw tsawra matsan dum myit madun ai wa rai nga ai. Asia dan hta anhte gaw nlaw la ai masha wuhpung rai nhtawm me, nga sat nga sa lam, mung masa lam hte makam masham yak hkrak ai lapran hta nga nga ga ai. Ndai zawn re ai masa lam lapran hta ra gadawn nga ai hpu nau ni hpe garum jaw na matu anhte hpe shaga nga ai re.

T = galai shai ai. Saradaw Kaba Cardinal Chales Bo gaw, shakawn kungdawn ka da ai sara a ga hpe bai galai nna tsun dan ai. ‘ Oh Madu Karai Kasang e, Madu a Wenyi hpe shangun dat nna, Lamu ga man hpe bai gram lajang da u” Ndai Nawku Hpung a Zapdaw zuphpawng hkrun lam hta Chyoipra ai Wenyi gaw, anhte hpe shi a matsun maroi nga ai shara de madat mara na matu anhte hpe shaga nga ai, nga nna tsun da ai. Dai majaw anhte gaw, Nawku hpung a asak hkrun lam hta nnan bai gaw gap na matu rau hkawm sa ai rai jang, anhte gaw, tinang a atsam hte hpa mung awng dang lu ai nre, chyoipra ai wenyi a atsam hte galai shai na chyeju galoi mung ra nga ga ai.

Shingrai, Missa Hkungga a hpang jahtum hta Asia dan zapdaw zuphpawng malawng ni hta na dat kasa marai (12) hpe ndai zapdaw zuphpawng (3) ya lapran tsun bawng ban lai wa sai lam ni yawng hpe labau shang masat masa hku nna, Nam pan hte shaman da sai Wan shadaw ni hpe lang nna, Missa Hkungga hpe woi awn galaw sai ni a shawng kaw lak san shakawn shagrau la lu sai rai nga ai.