Simsa Lam A Matu Hongkong Nawku Jawng Dingsi Ni Dum Lai Wa

Hongkong zinlawng hta, Democracy a matu shawa n-gun madun shakut nga ai masha hpawng hte Shimlam pyada ni a lapran adawt kasat hkat ai lam ni matut manoi byin nga ai majaw simsa lam akyu hpyi na matu Hongkong zinlawng ting na Nawku jawng dingsi ni hpe dum shangoi ai lam lai wa sai laban, September praw langai ya shani galaw lai wa ma ai.

Ucan shiga dap kaw nna shana wa ai shiga ni hta, Hongkong hta nga ai Nawku jawng ni yawng 44 tup ndai dingsi dum shangoi akyu hpyi shamu shamawt lam lamang hta shang lawm lai wa ma ai, Nawku jawng yawng 44 hta na 21 gaw Kahtawlik nawku jawng, 16 gaw Anglican Nawku jawng, Methodist Nawku jawng 4, kaga Hkristian Nawku jawng langai, the Divinity School of Chung Chi College ngu ai Miwa Dakkasu jawng kata na nawku jawng langai rai ma ai re, September praw langai ya, shani ka-ang hkying langai aten hta yawng dingsi rau dum shangoi akyu hpyi lam galaw lai wa ma ai re, nga ai.

Ya na zawn Nawku jawng dingsi ni rau dum shangoi akyu hpyi shamu shamawt lam galaw na matu ladat shaw hpang dat ai gaw Theresa Lee ngu ai Kahtawlik num hpaw mi langai re, “ndai shamu shamawt lam gaw Hongkong hta byin nga ai myit ga garan hkat lam ni hpe shapri shanem la hkat nna, simsa lam a matu jawm shakut na myit su hprang shangun ai lam tai wa na myit mada ai majaw galaw ai re” nga nna Theresa Lee shiga dap de tsun shana da nga ai.

Hongkong hta tara tawt lai ai bawng masha ni hpe Miwa Mungdan asuya hpang de shalai ap jaw mai na tara upadi nnan gyin shapraw na matu Hongkong asuya kaw nna Hongkong rapdaw hta shakut wa ai lam a majaw mungchying sha ni lam ntsa de pru ning hkap n gun madun lam galaw nga ai shata hte ru nna na wa sai hte, shawa n-gun madun ai masha hpawng hpe shabra na matu asuya pyada ni kaw nna adawt kasat lam ni galaw wa ai majaw Hongkong hta myit ga garan hkat lam ni grau grau sawng jat wa nga ai masa byin pru nga ai rai nga ai.

Source : ucannews.com