Si Mat Sai Ni Yawng A Poi Nhtoi Lamang (All Souls Day Program)

Hkungga tsawra ai Nu Wa Hpung masha ni,

Du na November shata praw 2 (Bat Langai) ya shani gaw, shaning shagu Catholic Nawku Hpung hta galaw nga ai, si mat wa sai hpunau ni hpe myit dum kyu hpyi ya ai poi n’htoi rai nga ai.

Dai ning gaw Covid – 19 chyambra ana zinli a majaw, masha hpawng n’mai ai ngu ai Mungdan asuya jahkrat da ai tara ni hpe hkan nna, Rada Kawng hpung lupwa hta, shawoi shaning na zawn, hpung masha ni hte arau Misa hkungga nawng jau ai lam n’nga sana re ai hpe n’dau shana dat lu n’ngai.

San Columban Nawku jawng kaba hta, jahpawt 6:30AM aten hta galang, shana de hkying 4:30PM hta galang, si mat wa sai hpunau ni a matu nawng jau ya ai Misa hkungga hpe RVA jinghpaw n’sen Facebook page hku nna, Live Misa shapoi sa wa ya na re. Hpung masha ni tinang a n’ta kaw nna, shapoi ya ai Live Misa hkungga hta kyu hpyi shanglawm na matu, saw lajin dat lu nngai.

Bai nna, Sara Gaiwang mare lawk hkan na Nawku jawng ni hta mung, htap htuk ai aten hta, Asuya masat da ai masha 30 a lawu shanglawm nna, si mat ai hpunau ni matu, Misa hkungga hpe Wajau ni sa du nawng ya wa na re.

Misa lawm la ngut ai hpang, Rada Kawng hpung lupwa de sa nna, n’nga mat sai jinghku ni a lupwa ni hpe sa du gawan kyu hpyi ai lam ni hpe mung, galaw mai ai.

Si mat sai jinghku ni a matu, Misa hpyi mayu ai ni gaw November shata praw 1 kaw nna, November shata praw 2 du hkra, seng ang ai jau ginwang rung hte, Rada Kawng Lupwa yu mada komitte ni hpe tau hkrau sa jaw da mai ai.

Nawku hpung hku nna, November shata tup hpe si mat ai hpunau ni a matu kyu hpyi ya ai shata masat da ya ai majaw, November shata laman si mat wa sai hpunau ni hpe kyu hpyi ya ai lam, shanhte a matu yaw shada nna, alu bang ai lam, mai kaja ai magam bungli ni hpe galaw ai lam, yak hkak nga ai hpunau ni hpe tsawra yu garum ai lam ni hpe galaw sa wa ga ngu, saw lajin dat nngai

Shana ai,

Hkristu a magam hta, Wa Saradaw Francis Daw Tang