Shinggyim Masha Ni Yawng A Mai Kaja Ai Lam Galaw Shakut Nga Ai Wa Sarabyin A Magam Bungli Ni A Matu Chyeju Dum Nga Ai Lam Vatican Hta Magam Gun Nga Ai Sumtsan Hkring Mang Ni Tsun

Shinggyim masha ni yawng a mai kaja ai lam a matu magam bungli galaw shakut nga ai Wa Sarabyin hpe chyeju dum ai nga nna, Vaitican hte seng ai sum tsan hkring mang ni tsun dat nga ai.

Vatican hte sum tsan kasa matut mahkai lam galaw nga ai Mungdan 183 kaw nna Vatican hte seng ai sum tsan hkring mang ni hte, lai wa sai bat langai, Jan praw 7 ya shani Vatican hta, wa sarabyin Francis hte hkrum shaga ai aten, Vatican hta magam gun nga ai mai gan sum tsan hkring mung ni yawng a gawng malai hku nna, Cyprus mungdan sum tsan hkring mang kaw nna lahta na zawn tsun dat ai lam rai nga ai.

Cyprus Mungdan sum tsan hkringmang George Poulides tsun ai hta, “jet ai simsa lam hte tara rap ra lam ni nga ai mungkan byin tai wa hkra gaw gap la lu na matu ra ahkyak ai npawt nhpang lung hkrung rai nga ai, shinggyim sari hpe makawp maga lam galaw na matu nsim nsa ding run galaw shakut nga ai Wa Sarabyin a shakut shaja lam ni matu wa sarabyin hpe chyeju dum nga ai,” nga nna tsun dat nga ai.

France (Pyin Tit) amyu shaga hte tsun shaga ai, sum tsan hkringmang wuhpung ning baw a mungga hta, shinggyim ahkaw ahkang atsawm lu la madang du na matu matut galaw shakut sa ra ai lam ni law law naw nga nga ai lam, dai ni hta, matsan chyaren re hkrum nga ai lam, kaw si hpang gara hkrum ai lam, kasat kala majam byin nga ai lam, dai ni na prat dep mayam yam sha hkrum nga ai lam, makam masham hte seng nna wang lu wang lang nawku kam sham lu na ahkaw ahkang hte seng ai lam, makau grup yin shingra tara masa hten za wa nga ai lam, Nuclear wan bawm hte seng nna hkrit tsang nga ra ai lam, sum tsan dat kasa matut mahkai lam yan hta hkrum nga ai yak hkak mang hkang lam ni, ndai zawn re ai lam ni law law naw nga nga ai majaw anhte matut nna n gun dat galaw ra ai lam ni law law naw nga nga ai, nga nna Vatican hta magam gun nga ai mai gan sum tsan hkringmang ni yawng a malai Wa Sarabyin hpe chyeju dum mungga tsun shaga ai Cyprus Mungdan sum tsan hkringmang a Mungga hta tsun dat nga ai lam Vatican shiga dap kaw nna shana dat nga ai. 

Source : Vatican News