Shawang Tsawra Myit Kaba Ai Lam Gaw Masin Salum Hpe Grau Kaba Shangun Nga Ai Nga Nna Wa Sarabyin Hkaw Tsun

“Hkristian ni hku nna matsan mayan masha ni hpe jaw lu jaw sha kam ai, shawang tsawra myit kaba ra ai, nra ai shara hta majoi lahpawt kau ai lam ni hpe koi gam ra ai,” nga nna lai wa sai bat langai jahpawt na Missa hkungga mungga hta Wa Sarabyin Francis hkaw tsun lai wa ai.

Wa Sarabyin tsun ai hta, “Hkristian ni hku nna matsan mayan ni hpe shawang tsawra myit kaba hte jaw lu jaw sha gam garan ai lam ni galaw ga, shawang tsawra myit kaba ai myit masa gaw masin salum hpe hpaw ya ai nna tsawra matsan dum lama ai magam bungli galaw lu na matu anhte hpe garum ya ai, raitim mung majoi lahpawt kau ai lam hpe koi yen nga ga, majoi lahpawt kau ai lam ngu ai gaw ra ai hta jan hkra mari ai lam hpe ngu ai rai nga ai” nga nna Wa Sarabyin Francis tsun lai wa ai.

Dai shani na kabu gara ai shiga ja chyum mungga rai nga ai Luke 21:1-4 hta na, Nawku htingnu alu sumpu hta sut su ai ni alu law law sa bang nga ma ai a lapran magri tingsen lap lahkawng sha bang ai matsan mayan gaida jan hpe madu Yesu mu mada ai, ja chyum mungga hte la kap nna lahta na zawn Wa Sarabyin hkaw tsun lai wa ai lam rai nga ai.

Matut nna Wa Sarabyin tsun ai hta, “ja chyum mungga hta na sut su ai ni gaw nhkru ai ni nrai ma ai, nawku jawng sa ai, alu bang ai lam ni galaw nga ma ai ni rai ma ai majaw kaja ai masha ni rai nga ma ai, Israel amyu masha ni hta, gaida ni, jahkrai nmai ni, bu htawt hkawm masha ni, chyasam masha ni ngu ai ni gaw shanhte a uhpung uhpawng hta matsan dik ai ni rai ma ai.

 Karai kasang hpe kam hpa ai a majaw gaida jan gaw shi lu ai ma hkra, yawng mayang alu bang dat ai rai nga ai. Ja chyum mungga a mungga madung gaw shawang tsawra myit kaba na matu saw shaga ai lam rai nga ai.

Dai ni na anhte a prat hta malu masha sha hpa nlu ai a majaw, tsi mawan nlu ai a majaw ma kaji ni law law si hkrum ra nga ma ai. Ndai mang hkang hpe anhte gara hku hparan na rai ga ta? ndai ga san gaw mai kaja ai lam galaw shapraw mayu ai anhte a masin salum kaw nna pru wa ai ga san rai nga ai.

 Jaw lu jaw sha kam ai, shawang tsawra myit kaba ra ga ai. Anhte hkum nan pyi lu na sha na yak nga ga ai, ngu nna tsun mayu ai ni nga na re, raitim mung lap langai lahkawng anhte a sumpu hta jan ai rawng nga nhten, dai jan nga hpe grau ra kadawn nga ai matsan mayan masha ni hpe gara hku garum lu mai na kun ngu ai lam hpe myit yu mai nga ga ai, ga shadawn tinang a arung arai ni bang da ai shara ni hpe chyan mada yu ga, gyepdin man gade nga nga ai kun, 2/3 sha nrai 10/20 pyi rai nga nhten, gyepdin man 40 lu ai monsignor hpe pyi mu yu nngai.

 Tinang hta dai daram law nga yang nkau mi hpe gam garan kau ga, laning mi hta kalang sha she shaw hpun nna zing da ai bu hpun palawng ni kade she law nga ai kun, jaw gam garan ga, tinang hta nga ai. lu ai hta na gam ya ai, garan ya ai ngu ai lam gaw shawang tsawra myit kaba ai lam rai nga ai” nga nna Wa Sarabyin Francis hkaw tsun lai wa ai lam Vatican shiga dap kaw nna shana dat nga ma ai. 

Source : Vatican News