Sharaw Wan Hpyen Tsin Yam Hkrum Australia Mungdan Sha Ni Hte Rau, Myit Hpawm Nga Ai Lam  Wa Sarabyin Tsun

Sharaw Wan Hpyen Tsin Yam Hkrum Nga Ai Australia Mungdan Sha Ni The Rau, Myit Hpawm Nga Ai Lam  Wa Sarabyin Tsun Dat Nga Ai Shiga 

Sharaw wan laja lana hkru hkat lam ni byin nga ai a majaw tsin yam hkrum nga ai Australia Mungdan mung chying sha ni hpe Madu Karai Kasang garum ya u ga matu akyu hpyi ya ga, nga nna January praw 8 bat masum ya shani San Peter pa kaba hta hpawng nga ai shawa hpawng kaba hpe tsun lajin lam galaw let Australia Mungdan mung chying sha ni the rau, myit hpawm nga ai, nga nna Wa Sarabyin Francis tsun dat nga ai.

Australia Mungdan shara law law hta sharaw wan laja lana hkru hkat lam ni byin nga ai bat lahkawng masum daram na wa sai the, maling kaba acre wan 25 jan daram hkru hkat mat sai, wan hta hkru hkat si lawm mat ai masha jahpan mung marai 20 jan rai nga sai re, nga ai.

“Mungdan a dingda-sinpraw maga daw hta kahtet shadang rawt tsaw wa nga ai majaw sharaw wan grau ja wa na tsang shara nga nga ai, dai re majaw dai grup yin hta shanu nga ai mung chying sha ni hpe shara htawt nawt sit jahkrat ai lam ni galaw ra wa na masa nga ai, tau nau shajin da ga”

 nga nna seng ang ai asuya lit nga ai ni kaw nna ndai bat masum ya shani ndau shana lam mung galaw dat nga ma ai.

Grai kahtet ai hte ubung laja lana bung nga ai a lapran wan sat masha ni kaw nna sharaw wan ga lam ni shakut galaw nga ma ai, asuya hpyen hpung ni kaw nna mung wan hpyen a majaw dum nta nlu byin mat sai hkying lam the ru ai tsin lam hkrum masha ni hpe malu masha hte kaga ra ai arung arai ni hting let shalai ya lu hkra shakut galaw nga ma ai.

“Ya na zawn mungdan yak hkak hkrum nga ai aten akyu hpyi na matu, akyu hpyi ai hku nna sha, yak hkak hkrum nga ai masha ni hpe ta tut tsawra matsan dum lama ai magam bungli galaw daw lu na n gun atsam lu na mai na rai nga ai”

nga nna Australia mungdan Kahtawlik saradaw uhpung rapdaw ning baw Saradaw kaba Mark Coleridge kaw nna ndau shana ai lam mung galaw da nga ai. 

Sharaw wan hpyen a majaw tsin yam hkrum nga ai masha ni hpe garum lakawn la lam galaw na matu kaga garum ningtum uhpung ni the nawku hpung ta gindun shamu shamawt lam ni galaw mat wa na, tsin yam hkrum masha ni shanhte a prat bai gaw gap sa wa na hkrun lam hta nawku hpung hku nna madi shadaw lam dingrun galaw ya na, ndai zawn galaw lu hkra lak san alu hta shing gyin ai lam mung galaw sa wa na re,” nga nna Australia mungdan Kahtawlik Saradaw uhpung rapdaw ning baw Saradaw kaba Mark Coleridge tsun dat nga ai lam Vatican shiga dap kaw nna shana dat nga ai.

Source : Vatican News