Shangai Shaprat Wa Na Masha Asak Hpe N Hkap La Ai Wuhpung Wuhpawng Gaw Prat N Galu Ai nga Wa Sarabyin Tsun Dat Ai Shiga

May 14, bat mali ya shani Italay mungdan, Vatican makau Auditorium della Conciliazione hta galaw ai “Gerneral States of Birth” ga baw ginlam hte zuphpawng hpawng ai hta “myit hkrum rapra ai a ahkyak ai lam, ma shangai shaprat ai shadang hpe n masat da ai sha shatsaw ra ai lam, kun dinghku shagu hpe makawp maga ra ai lam, prat ban shagu ma shaprat sa wa ra ai lam” Wa Sarabyin Francis shadum n-gun jaw da nga ai.

Zuphpawng hpe “Forum for Family Associations” kawn zinglum let galaw ai rai nna Italy mungdan kata na hpaji ninghkring ni hte rau Prime Minister Maria Draghi mung shang lawm ai lam Vatican Shiga Dap tsun da ai.

Italy mungdan rawt jat wa na matu shinggyim asak kaw nna hpang ra ai ngu Wa Sarabyin shi a mungga hta tsun da ai.

Shangai shaprat ai masha shadang yawm ai lam

Hta shinggyin jahpan hte maren “sak ram ramma ni kasha lu mayu ma ai, raitim, prat masa hta hkan nna shanhte shingran da ai lam ni a majaw hte, shingra maka hte lamu ga masa lam ni a majaw ramma ka-ang hkup ni gaw ma lahkawng ram sha la mayu ma ai ngu Wa Sarabyin masam maram da ai.

Italy mungdan gaw Europe dan hta ma shangai shadan yawm htum mungdan langai rai nna, 2020 shaning hta Italy mungdan ma shangai shadang yawm dik htum mungdan tai mat ai gaw Covid-19 tsin-yam a majaw gaw n rai nga ai; Raitim, lani hte lani grau grau katsi sawng wa ai shingra tara a majaw rai nga ai, ngu masam maram da ma ai.

Kun dinghku shagu hpe makawp maga ra ai.

Ya byin nga ai masa lam kaw nna makawp maga la na matu kun dinghku ni hpe yu lakawn ai lam nga ra ai, grau nna, prat masa hta hkan nna ma shangai na hkrit tsang nga ma ai majaw ma shangai na shayawm masing hte kun dinghku gaw de ai ni hpe yu lakawn lam matsun ya ra ai ngu Wa Sarabyin Francis madi madun da ai.

Kun dinghku ni ndai zawn ma shayawm masing jahkrat wa ai madung masa lam gaw, bungli hkrak lu na myit mada shara n law ai, ma ni hpe shakung jahpan ai hta hkrat ang ai ja sut gan grai law ai majaw kanu kawa ni bungli ten lai hkra bungli galaw ra ai, hte bungli shajan ni galaw ra ai lam ni nga wa ai, kanu kawa ni hte rau kachyum kagwi ni mung ma ni a matu myit lawm ya ra wa ai lam ni a majaw rai na re ngu Wa Sarabyin shi a ningmu hpe mung jahkrat dan da nga ai.

Dai ni na prat masa hta hkan nna malu masha taw wa ai hte matsan jam jau lam kaba wa ai majaw mung ma la na matu hkrit tsang wa ma ai ngu mung matut tsun dan da nga ai.

Ndai zawn ma n la ai mabyin a majaw gaya kahpa hkrum ai gaw kanu myu shayi ni n rai nga ai; gaya kahpa hkrum ai gaw shinggyim wuhpung wuhpawng she rai nga ai. Hpa majaw nga yang “Shangai Shaprat Wa Na Masha Asak Hpe N Hkap La Ai Wuhpung Wuhpawng Gaw Prat N Galu Ai.” Shangai wa na Ma ni a myit mada shara gaw mungkan masha ni ma bai shangai na hpe rai nga ai ngu mung hkaw tsun da nga ai.

“Kun dinghku ni hpe daini na prat a madung ka-ang kaw tawn da ai lam n nga yang shawng lam myit mada shara nga na n rai sai; Raitim kun dinghku ni lahkam ningnan bai lahkam ai rai yang yawng gaw ningnan de bai lahkam sa wa na ra ai” ngu n-gun jaw da nga ai.

Chyeju Kumhpa shagu hpe hkap la ra ai. Masha shagu hkam la lu ai sak prat gaw chyeju kumhpa ni hta na kaba dik htum chyeju rai nga ai. Kadai mung dai sak prat hpe tinang tingkyen hkum a matu n shangai la lu ai. Shawng ningnan hta chyeju kumhpa langai nga ai. Anhte ni yawng dai chyeju kumhpa langai hpe hkam la lu saga ai rai nna dai asak hpe shalai ya ra ai; ma gaw masha hkum shagu a matu kaba dik htum ai chyeju kumhpa re ai majaw dai hpe ta tut hkrang shapraw sa wa ra ai, ngu mung shadum da nga ai.

Tinang tingkyen myit lawm ai hpe sha madung da nna, ma shaprat ai lam hpe shayawm yang gaw sak kaba ai ni sha nga ai dai wuhpung wuhpawng hta yawng htum hkring mat na rai nga ai.

Prat Ban Shagu Ma Shaprat Ai Lam Hpe Nga Ra Ai

Anhte ni sut masa lam, jak ladat hpaji lam, makau grupyin hpaji lam ni hte seng ai hpe shatsaw sa wa ra ai ngu tsun nga ga ai hta, prat ban shagu ma shaprat ai lam nga ra ai hte seng nna grau nna tsun ra ga ai, ngu mung Wa Sarabyin tsun shadum da nga ai.

Anhte kun dinghku ni hte ma ni hpe ahkyak shatai da ai lam n nga ai rai yang makau grupying ni hpe shatsawm jahtap, makawp maga lam hpe galaw lu na n rai ga ai. Galoi mung agrin nga ai rawt jat galu kaba lam gaw dai kun dinghku ni hta ma shaprat ai kaw ningpawt prat ai rai nga ai, ngu nna mung Wa Sarabyin sang lang da nga ai.

Shangai shaprat ai lam n nga ai sha ningnan hpang ai lam hpe n galaw lu ai. Ramma hte sasana ma ni n nga jat yang gaw myit mada shara mung n nga ai.

Chyahkring chyahkra galu kaba rawt jat lam hpe sha n mai hkan ai. Prat masa hta hkan nna ningnan bai hpang na matu gade mi yak hkak ai raitim, anhte a prat hta myit mada shara kaba hte ningnan ningnan ni hpe hpaw hpang ra ai. Ma shaprat ai lam hpe shayawm ai mabyin hte chyam bra ana tsin-yam gaw anhte hpe galai shai na matu hte lit la sa wa na matu shadum ya nga ai.

Hpaji Jawng Hte Hkan Shatup Ra Ai Lam

Kun dinghku lam hte seng ai hta hpaji jawng mung lawm ai. “Hpaji jawng na tsang madang hte sha kung hpan wa na gaw n rai nga ai; Raitim, jawng ma shagu gaw shi a prat hta hkan nna dai tsang madang hpe hkrum katut ai a marang e chye chyang kung hpan wa lu ai.

Ginlung kahkying gumding lam

Ginlung kahkying gumding lam mung ahkyak ai ngu mung Wa Sarabyin Francis matut tsun shadum da nga ai. kun dinghku kata ma shaprat ai shadang kaba wa na matu mahkrun lam ni, sut masa lam ni, shada shana shabra hkak ai lam ni, htung lailen ni mung grai ahkyak nga ai.

Kun dinghku hte seng ai hkrang tara ni hpe grau grau dam lada ai hte tsaw grau ai madang de sa wa na ra ai; dai zawn dam lada tsaw grau ai madang de rau sa wa na matu law malawng myit hkrum ai masa hta hkawm sa na ngu ai hta, yawng a akyu ara matu shaning kaba akyu ara matu rawt sa wa ra ai; ramma ni hta ya ya ra ahkyak ai lam ni grai law nga ai hta gring ai hte pahkam hkam ai lam nga ai bungli ni lu hkra tam ya ra ai; shanhte a dum nta ni hta sim lam nga ra ai; mungdan kaga de htawt pru hkawm n ra hkra lam tam ya ra ai, ngu mung shadum n-gun jaw da nga ai.

Kun dinghku madang hte masa lam ni hpe mung sawk sagawn let shada shi jaw hkat let garum shingtau hkat na mung grai ahkyak nga ai.

Ma Shangai Shaprat Lam N Nga Yang Shawng Lam Myit Mada Shara Mung N Nga Ai

Hpang jahtum mungga hta “shinggyim prat hta shawng lam myit mada tawn da ai ni let ningnan hpang ai lam galaw nga ma ai ni yawng hpe chyeju dum shakawn ai lam, dai zawn shakut shaja nga ai aten ni hta yak hkak jam jau hkrum nna myit mada shara n nga mat ai zawn hkam sha chye ai lam, rai ti mung, myit daw myit hten ai lam n nga ai sha matut manoi shakut sa wa ra ai lam tsun n –gun jaw da ai. Hpa majaw nga yang, dai gaw mai kaja lam a matu tsawm htam ai yup mang shing ran rai nna, shawng lam hpe gaw gap ai mung rai nga ai.

Shangai shaprat ai lam n nga ai ai gaw shawng lam myit mada shara n jaw ya lu ai, n gaw gap lu ai ngu Wa sarabyin a Mungga hta shadum sadi jaw, n-gun jaw da nga ai hpe Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-05/pope-francis-general-state-of-births-italy.html