Shan hpraw shan chyang garan ginhka lam nnga u ga makawp maga ai tara Upadi hpe, mung shawa masha ni a matu jahtuk gaw de da na ra ai lam US Saradaw Ni Tsun Dat Nga Ai shiga

Cardinal Kevin Farrell, the Prefect of the Dicastery for laity, Family and Life, gaw June shata praw (5), bat (5) ya shani hta Hkristan masha ni hpe makawp maga lam hte seng nna, mungdan kata hta upadi tara hpe tengman dinghpring ai hku gaw de sa wa ra ai ngu tsun da ai.

Hkristan wuhpung wuhpang kaba mung tara rapra lam hte simsa lam hte seng ai hta, myit rum gahkring gumding nga ai lam madun na matu Roma de sa du nna nawku daw jau akyu hpyi lamang hta sa lawm ma ai.

Wa Sarabyin Francis gaw George floyd a wenyi matu hte America masha ni a matu akyu hpyi ya ai hte America hta amyu ginhka ai lam n galaw na matu shadum da nga ai. Dai zawn Wa Sarabyin shadum ai hpang lahkawng ya na yang Floyd a matu hpawng de akyu hpyi ai lam galaw ma ai.

George Floyd gaw shan chyan amyu rai nna, 2020, May 25 ya shani US shan hpraw balik lahkawng a du manat sat kau hkum ai wa rai nga ai.

“George Floyd hpe dai zawn sat kau ai a majaw garan ginhka ai n tara lam, mungkan ting hta gasu gabrawng wa na hpe hkrit tsang nga ma ai,” ngu Cardinal a ningmu hpe tsun da nga ai. “Ya na zawn America mung masha ni hta dai zawn garan ginhka ai lam naw nga nga ai majaw grai yawn ai hte myit n pyaw ai” nga nna matut tsun da nga ai.

“Dai zawn galaw ai gaw n jaw n ang ai hte n tara ai re hpe anhte chye ai. Kaja wa nga yang simsa ai hta arau nga pra na hte shada tau chye hkap la hkat na hpe shatsaw ai gaw manu dan ai lam rai nga ai,” nga nna matut ja hpra dan da nga ai.

Hkristan masha ni gaw Madu a kabu gara shiga hta sak hkrung nga ai ni rai ga ai majaw shada hkap la chye na hkat let mara dat garum shingtau hkat ra ai rai nga ai.

Kamsham ai masha ni a masin salum hta Hkristu a simsa lam teng sha nga ai rai yang, shada shingjawng ai lam, kaga masha ni a sari arawng sadang hpe jahprat nna dip shanyem kau ya ai lam galaw ai, aten hte shara n nga na rai nga ai.

“Tara upadi gaw laika mai sau kaw sha matsing da ai nre ai sha, masha shagu a bawnu nyan hta matsing da nna hkan nang hkan sa ra ai. Dai majaw Madu Yesu sharing shaga ai zawn mung masha shada garum shingtau hkat lu ai tara n nan hpe bai gaw de ra na re” ngu Cardinal matut tsun shadum da nga ai.

“Ngai nanhte hpe tsaw ra made ai zawn, nanhte shada da mung tsaw ra nga mu,” (Yawhan 15:12,17). Madu Yesu a mungga hpe lakap nna Cardinal tsun ai gaw “Anhte ni hta n bung ai lam ni hpe langai sha hta pawng hpawm la ra ga ai.

Dai majaw Hkristan masha ni gaw galoi mung mai kaja lam hta shada myit hkrum myit ra let jawm galaw sa wa ga. Teng man ai hta hkawm sa na matu hkrit tsang ai lam nmai nga ai;” ngu Cardinal Farrell tsun shadum da nga ai. 

Cardinal Farrell gaw N tara ai hku garan ginhka ai a majaw si mat ai ni a matu mung akyu hpyi ya nga ai. “Shanhte a sai hkaw ai gaw, anhte tsawra ai mungdan hpe kaja wa sha simsa ai wuhpung wuhpawng byin tai wa hkra garum ya u ga,” ngu shawng lam a matu mung matut akyu hpyi ya nga ai lam hpe Vatican shiga dap kawn ndau da nga ai.

https://www.vaticannews.va/en/church/news/2020-06/cardinal-farrell-liturgy-st-egidio-george-floyd-protests-racism.html