Shajan Shalai Re Ai Masa Nre Ai Sha Akyu Hpyi Nawku Ai Lam Madaw Rai Ra Ai, Nga Nna, Masha Wan 5 Daram Sa Dung Lawm Lai Wa Ai Black Nazarene Poi Hta Cardinal Tagle Tsun

“Shajan shalai re ai masa nre ai sha akyu hpyi Nawku ai lam madaw rai ra ai,” nga nna January praw 9 ya shani, Philippines Mungdan Manila Mare daju hta galaw lai wa ai Balck Nazarene ngu ai makam masham poi kaba Missa hkungga mungga hta Cardinal Tagle tsun dat nga ai. Masha wan 5 daram sa dung shang lawm ai, poi du na shawng shana na Missa hkungga mungga hta lahta na zawn tsun dat ai lam rai nga ai. 

Fanatics ngu ai shajan shalai re ai lam hpe kam ai myit masa hte, akyu hpyi nawku ai ngu ai lam nbung nga ai lam hpe tsun shadum lam galaw let Cardinal Tagle tsun ai hta, “kaja wa jet ai akyu hpyi nawku mayu ai myit masin the du sa lawm ai ni chyu sha ndai poi a lak lai ai lam hpe chye na lu na rai nga ai. Akyu hpyi nawku lam galaw na matu du sa ai ni gaw Karai kasang hpe tsawra kam hpa ai lam nga nga ai, raitim mung shajan shalai re ai myit lai masa rawng ai ni gaw shanhte hpe ahkyak shatai ai masha ni hpe sha hkan tam nga ma ai masa rai nga ai. Catholic hpung masha    ngu ai gaw Black Nazarene poi hte dai poi nhtoi hta chyu sha makm masham shakut akyu hpyi nawku ai lam galaw ai ni nrai ai, akyu hpyi nawku ai lam ngu ai gaw Karai kasang hpe sadi dung tsawra kam hpa ai myit hte shani shagu galaw nga ra ai lam she rai ai” nga nna Cardinal tsun dat nga ai.

Black Nazarene poi ngu ai gaw, Manila mare daju Quiapo Nawku Jawng kaba, na hpun hte galaw da ai lahput hpundi let Wudang hpai nga ai, akyang nsam re ai Madu Yesu a sumla kaba hpe hpai shing grup akyu hpyi lam galaw ai makam masham poi rai nga ai.

 Shaning shagu January praw 9 ya shani galaw ai ndai poi hta hpung masha ni wan lam hte ru nna sa du shawng lam ma ai rai nga ai. Wan lam hte ru nna akyu hpyi gawoi lam galaw nga ai aten, la sa wa ai hpajet sumpan ni hte Yesu a sumla hpe hkra ahtawk la lu hkra htu ganawng matsup lam ni galaw ai masha grai law ai poi rai nga ai. Philippines Mungdan masha ni hku nna ndai poi sa du shang lawm yang shanhte a shut hpyit mara ni hpe raw hkraw yeng seng kau ya lu ai, ngu nna mung grai kam sham ma ai rai nga ai.

Shim lam hte seng nna lit la ya na matu hpyada marai 7,000 jan shara jahkrat da ai, ra ahkyak lam byin pru wa yang na matu nga nna hpyen la ni hpe mung asuya kaw nna jin jin shajin da lam ni mung galaw da nga ai, nga nna Ucan shiga dap Internet laika man hta ka shana da nga ai.

Source : ucannews.com