September Shata Akyu Hpyi Yaw Shada Lam: Makau Grupyin Tsawm Htap Ngang Grin U Ga Matu (An Environmentally Sustainable Lifestyle)

Makau grupyin shingra tara asak galu ngang grin tsawm htap nga na hpe madung da lata sa wa lu mu ga hte dai Karai Kasang hpan da ai hte maren tsawm htap ai makau grupyin hpe hkap la manu shadan makawp maga let anhte a sak hkrung lam hpe lata la chye na matu akyu hpyi ga. Ramma ni mung dai makau grupyin shingra tara hpe jahten shaza ai lam n nga na myit daw dan da ai lam ni hpe hkrak tup hkan sa let dai hta kabu pyaw lu mu ga matu akyu hpyi ga.

Ndai Wa Sarabyin Francis a akyu hpyi yaw shada ai lam hpe September 1, bat 3 ya shani Vatican Shiga Dap kaw nna ndau da ma ai.

Asak naw ram ai masha yawng gaw makau grupyin tsawm htap ngang grin hkra yu ren up hkang makawp maga shatsawm shahtap sa wa ai kasi kamang ni tai na matu Wa Sarabyin Francis September shata yaw shada lam hpe hkrang mu nsen na video mahkrun lam hku tsun shadum n-gun jaw da nga ai.

“Asak naw ram ai masha ni makau grupyin hte shinggyim bawngring lam ni hta myit hkrum myit ra  hte rau masin jahkrat, ta tut hkrang shapraw sa nga ma ai hpe mu lu ai majaw grai kaba n-gun lu nngai,” ngu hkrang mu nsen na video hta Wa Sarabyin Francis tsun da nga ai.

Anhte a akyu kaba lam hpe jaw ai anhte a mungkan hte anhte a gintawng

Ramma kaji ni gaw Asak naw ram ai salang ni kaw na machye machyang law law hpe sharin hkam la lu mai nga ai; shanhte gaw anhte a mungkan, anhte a gintawng hpe makaw maga ai hte seng ai hta ahkyak ai masha ni rai ma ai, shawng lam myit mada shara ni rai ma ai, ngu Wa Sarabyin Francis matut tsun da nga ai.

Anhte gara hku lu sha ai, gara hku hkawm sa ai, anhte a lu hka, anhte a n-gun atsam ni hpe gara hku akyu jashawn jai lang ai, makau grupyin hpe jahten shaza chye ai plastics ni hte kaga arung arai ni hpe gara hku sung lang na, hparan na, ngu ai lam ni hpe sumru nna masin jahkrat galaw sa na ahkaw ahkang kaba hpe akyu jashawn hkam la ra ga ai, nga nna mung hpaji jaw n-gun jaw shadum da nga ai.

“Galai shai shatsawm sa wa na lam hpe lata ga; sak naw ram ai ni a sak hkrung nga sat nga sa lam ni gaw makau grupyin shingra tara hpe manu shadan makawp maga sung lang chye ai tsaw ai ladat hte bawngring rawt jat lam hpe shatsaw ya let rau hkawm sa nga ga,” ngu mung n-gun jaw da ai.

Atsam marai rawng sari rawng ai hte kaja grau ai hpe lata let galai shai shatsawm sa wa lu na matu akyu hpyi nga ga; du na ra ai aten ni hta mung anhte a mungkan, anhte a gintawng gaw sak naw ram ai ni a lata hta tsawm htap ngang grin nga hpe myit mada ai ngu Wa Sarabyin Francis ginchyum dat mungga tsun da nga ai hpe Vatican Shiga Dap kaw nna ndau da ma ai.

By: Fr. Patrick Gawmaw Hkawng Yae

RVA-Kachin Service (Myitkyina)

Source: Vatican News