Sasana Ma Hpung Ni A Hkrum Zup Hpawng Galaw Ai Lam

Alam Bum Jau Ginwang wang, San Mary Nawku Jawng wang hta Sasana ma Hkrumzup hpawng hpe galaw la lu sai lam shiga

   Alam Bum Jau ginwang kata Alam mare, San Mary Nawku Jawng wang kata,hta March 20, 2021, bat kru ya shani Ginwang up Wa Jau Paul Kinsa Tu Awng a lam matsun ai hte maren Sasana ma hkrumzup hpawng hpe angwi apyaw galaw la lu sai lam Alam bum jau ginwang Sasana ma hpung lit hkam MaMa Pri Lum tsun ai kaw na chye lu ai.

  Ndai zawn Sasana ma hkrumzup hpawng (holy-childhood gathering) hpe Alam Bum Jau Ginwang kata na Sasana ma ni shaning shagu, laning mi hta mali lang galaw ma ai lam chye lu ai.

  Sasana ma Hkrumzup hpawng lamang hpe jahpawt daw hkying (9:00 a.m) aten hta Misa Hkungga hte hpang ai rai nna, Misa Hkungga hpe Alam Bum Jau Ginwang, Ningtau Jau Fr. Jerome kaw nna woi awn la ya ai.

  Hkrumzup hpawng lamang hpe Misa Hkungga nawng jau ngut ai hpang matut manoi galaw sa wa ma ai hta Alam Bum Jau Ginwang kata hta magam gun nga ai Sasana ma hpung lit hkam MaMa Angela Chyauhpa Pri Lum (SFX) hte Sasana ma hpung woi sara/num ni kawn woi awn la ya ai.

  Shaga la hkrum ai Vacation lamang hku nna, Myitkyina, Awng Nan, San Francis Xavier mama tai jawng num ni kaw nna mung shang lawm garum la ya ai lam chye lu ai.

  Sasana ma hkrumzup lamang galaw ai a yaw shada ai lam gaw Alam Jau Ginwang kata na Sasana ma ni shada da ginlung na matu, nawku hpung hta mung grau nna shakut shaja chye wa na matu, Nawku Hpung a tara laika sharin hkam la ai hta myit lawm myit jung ai hte sharin hka ja sa wa lu na matu hte Sasana ma hpung hte seng nna Jau Ginwang masing hpe grau hkau chyap chye na hkan wa lu na matu ni re lam chye lu ai.

  Sasana ma hkrumzup hpawng hta lam amyu mayu hku garum la ai gaw Kanu Nu Num Hpung ni rai ma ai lam mung chye lu ai.

  Alam Bum Jau Ginwang, Sasana ma hkrumzup hpawng hpe 2021 shaning, No. 1 lang na galaw la lu ai re lam Sasana ma hpung lit hkam MaMa Pri Lum tsun ai kaw na chye lu ai.

By Fr. Patrick Gawmaw Hkawng Yae

#rvakachinservice