Sarabyin Shiga ( 07 February 2022 )

Wa Sarabyin: Hten Run Ai Lam N Nga Mat U Ga Matu Shinggyim Nau Na Myit Majing Hte Sak Hkrung Nga Pra Ra Ga Ai

2019 shaning, UN General Assembly kawn lajang da ai, Mungkan simsa lam hte seng ai hta shinggyim nau na majing myit jasat hte rau nga rau hkawm sa nga ga ai, ngu Wa Sarabyin Francis hte The Grand Imam of Al-Azhar, Ahmed Al-Tayyeb yan Abu Dhabi kaw, dai shaing February 4 ya shani, lata masat seng htu da ai, UN kawn lit la htut shapraw ai lahkawng ning hpring “The International Day of Human Fraternity” nhtoi, February 4 ya shani Wa Sarbyin Francis hkrang mu nsen na Video hte mungga shaga da ai hpe Vatican Shiga Dap kaw nna ndau da ma ai.

Nau na myit majing hte tsaw ra kanawn mazum ai gaw manawn masham ai, gumshen ai, hte n tara ai lam ni hpe shayawm shamat kau lu ai, ngu Wa Sarabyin Francis dai shani na mungga hta sharin shaga da ai.

Shinggyim nau na myit majing hte kanawn mazum ai gaw shinggyim masha shada hku nau lam a ahkyak dik ai ni hta na langai rai nna, n-gawn tawa ting hte mungkan ting hta sari manu nga dik ni hta na langai mung rai nga ai. Dai gaw yak hkak jam jau ai ni hpe, shing n rai, hkrat sum ai ni hpe n mu jahpai, jahka kau ai lam ni n byin shangun ai; Raitim, shinggyim kun dinghku langai hta sha rai ga ai hpe dum shai let shada hkap la shangun ai, shada karum shingtau hkat shangun ai. Anhte gaw hpu nau ni hkrai rai ga ai!

Ni htep ai hpu nau ni hpe tsaw ra ai kam sham ai masha shagu gaw hpu nau ni a matu shanhte a myit masin kaw nna nan Karai Kasang kaw akyu hpyi ya ai.

Nau na myit majing rawng ai ni gaw Karai kasang kaw tinang a masin salum hpe hpaw da ai; hpu nau ni hpe nau na myit majing hte tinang a prat hpe ap nawng let shada tsaw ra karum shingtau nna shada hku hkau chye na ya lu ai.

Nbung pre ai ni yawng rau ninghtan let hkawm sa ai gaw ginlum kahkyin gumding lam rai nga ai; rau ninghtan hkawm sa ai gaw n bung pre ai lam ni hpe shabung shapre la ai hpe tsun ai n rai nga ai, ngu Wa Sarabyin Francis tsun da ai.

“Daini na aten gaw shada karan ginhka, shada singa hkat na aten n rai sai; anhte gaw langai hte langai laklai laksan masha ni rai ga tim, hpu nau ni hkrai rai ga ai.

Masha hkum shagu gaw tinang a sari hpe manu shadan chye ra ai, hkungga ra ai; hpu nau ni a sari manu hpe mung hkungga manu shadan ra ai; dai sari manu hte rau hkawm rau sa na matu shada saw shaga hkap la hkat ra ai; dai sari manu ni hpe jaw ya ai Karai kasang hpe chyeju dum let “anhte gaw hpu nau hkrai rai ga ai” ngu ai myit masin hte “nbung pre ai ni yawng ninghtan ginlum kahkyin gumding rau nga pra ga, ngu Wa Sarabyin Francis n-gun jaw saw shaga da nga ai.

Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-02/pope-francis-second-human-fraternity-day-message.html