Sara kaba Yawhan Nlam Gam Li A Hpang Jahtum Dinghta Hkrun Lam

Sara kaba Yawhan Nlam Gam Li a makoi mayang hpe 17.10.2022 ya jahpawt 9:00AM ten dum nta kaw akyu hpyi nna 10:00AM ten Edin jau ginwang,San Luka Hkawlik jawng wang,San Luka Nawku jawng hta Misa hkungga akyu hpyi nna Rada Kawng Kahtawlik Lup ding Lupwa de makoi mayang sai.

Sara kaba Yawhan Nlam Gamli gaw asak (80) ning hta nhtoi 15.10.2022 bat Kru ya jahpawt 9:56AM ten hta madu kaw yup pyaw mat sai rai nga ai,

Ndai Sara kaba Yawhan Nlam Gam Li a hpang jahtum makoi yang Misa hkungga akyu hpyi lamang hta Myitkyina Saradaw Sasana kaw na Wa Jau ni,Manmaw Saradaw Sasana kaw na Wa jau ni,Columban Jau ni,Tara hkaw sara/num ni,uhpung shagu na Mama ni,Nawku hpung  masha  hkying lahkawng (2000) daram sa du akyu hpyi shakram lai wa sai rai nga ai,

Sara kaba Yawhan Nlam Gam Li gaw Myitkyina Edin, Emya, Jan Mai Kawng ni hta lit hkam sara magam gun lai wa nna, Edin San Luka Chyum jawng nnan hpaw hpang wa ai kaw nna ningtau jawng up hte sharin sara magam hpe shaning (40) jan gun hpai wa ai rai nga ai.

Sara kaba Yawhan Nlam Gam Li a ga manoi gaw “bungli mung galaw u,akyu mung hpyi u” ( Ora Et Labora) ngu lam rai nga ai.

Sara kaba Yawhan Nlam GamLi gaw kam gring ai,makam masham sung ai,hkungga tsawra chye ai,htunghking lam hpe chye chyang ai,nawku daw jau ai lam ni hta hpung masha ni,jawngnum jawngla ni hpe woi awn chye ai yawng hpe kasi kaja madun ai kawa,Madu Yesu hpang hkan nang ai sape majing prat hku nna ap nawng lai wa sai rai nga ai.

Sara kaba gaw Myitkyina Saradaw ginwang Tara hkaw Sara magam gun  (50) ning ja jubali Sasana magam gun ningtawn shagrau lakmat lu da ai sara kaba rai nga ai