Sanpra Ai Petru Hte Pawlu A Poi Nhtoi Sa Du Shagrau Na Matu, Constantinople Nawku Hpung Ningbaw Dat Kasa Ni Vatican De Sa Du 

28 June 2019, Vatican

Hpawt ni June shata 29 ya shani ang ai, Sanpra ai Petru hte Pawlu a poi nhtoi hpe sa du shagrau na matu Turkey Mungdan Istanbu hta daju ai Constantinople Nawku hpung ningbaw dat kasa uhpung ni, June 27 the 28 lahkawng ya Vatican de sa du nga ai lam chye lu ai.

Sanpra ai Petru hte Pawlu a poi nhtoi gaw Nawku hpung ningbaw Wa sarabyin a poi, nawku hpung hpe makawp maga ai san pra ai masha yan a poi nhtoi rai nga ai majaw ndai nhtoi gaw, Vatican hta mung Roma Mare ting hta mung, rung ni jawng ni yawng pat ai, shawa hkring sa nhtoi rai nga ai. Shaning shagu ndai poi nhtoi hta Nawku Hpung hpe hkungga shagrau ai lam madun na matu Constantinople Nawku Hpung ningbaw dat kasa uhpung ni Vatican de sa du gawan ai lam galaw ai rai nga ai. Dai zawn sha, Vatican hku nna mung Constantinople Nawku Hpung hpe magawp maga ai San Pra ai Andrew a poi nhtoi hta shaning shagu Turkey mungdan Istanbu de dat kasa uhpung shangun nna sa du hkungga ai galaw ai rai nga ai, ndai Sanpra ai Andrew a poi nhtoi gaw November shata 30 ya shani rai nga ai.

Ndai lang Vatican de sa du ai dat kasa uhpung hta, Turkey Mungdan OIstanbu hta daju ai Orthodox nawku hpung ning baw Bartholomew lawm nga ai zawn, World Council of Churches ngu ai mungkan Hkristian uhpung a gawng malai tai let Orthodox Saradaw kaba Job mung lawm nga ai, Orthodox Saradaw kaba Job gaw Kahtawlik Nawku Hpung hte Orthodox Nawku Hpung lapran matut mahkai lam hte seng ai magam dap hta ginrun ning baw lit hpe gun hpai nga ai Saradaw mung rai nga ai.

Vatican hta du nga ai ndai dat kasa uhpug hpe dai ni June shata 28 ya shani Wa Sarabyin Francis kaw nna hkap la hkrum shaga na rai nga ai, de a hpang Hkristian ginlung gahkyin lam hte seng ai Nawku Hpung ginjaw magam dap lit nga ai ni the hkumzup bawng ban ai lam mung galaw na rai ma ai re.San pra ai Petru hte Pawlu a poi nhtoi rai nga ai hpawt ni June shata 29 ya shani hta gaw, Wa Sarabyij hkum nan nawng ya na Missa hkungga hta ndai dat kasa uhpung ni shawng lawm na rai ma ai lam chye lu ga ai.

Source:Vatican News