San Yawsep Gaw Azim Sha Rai Nna Ma Yesu Hpe Bau Kaba Ai Wa Rai Nga Ai, Nga Nna Wa Sarabyin Tsun

San Yawsep gaw, galaw ra ai lam ni hpe ta tut galaw nga let, shawng lam yaw shada myit mada lam ni tawn da rai, ma Yesu hpe azim sha rai nna bau maka, bau kaba ai wa rai nga ai, nga nna lai wa sai bat lahkawng ya jahpawt na Missa hkungga Mungga hta Wa Sarabyin Francis hkaw tsun lai wa ai.
Dai shani na kabu gara ai shiga ja chyum mungga rai nga ai Mt 1:18-25 hte la kap nna wa sarabyin hkaw tsun ai lam rai nga ai.

Wa Sarabyin tsun ai hta, “San Yawsep gaw makam masham grai kaba ai wa, tara hkan sa ai wa, bungli grai shakut shakut galaw ai wa, shagrit shanem ai wa, Maria hpe tsawra ai wa rai nga ai, shi n chye na ai lam ni byin pru hkrum kadup wa ai aten nhkap la na matu nnan daw hta shi galaw lai wa ai raitim, shi galaw gun hpai sa ra na magam bungli hpe Karai Kasang shaleng ya ai shaloi gaw, kadai hpe mung aput angun tsun mara shagun ai lam ni n galaw ai sha azim sha rai nna shi galaw ra ai lit lamang ni hpe gun hpai ai wa rai nga ai.

Ma Yesu shangai lu na shara hpe shi tam ai, ma kaba kung zut wa hkra shi garum ya ai, bau maka makawp maga ya ai, bungli galaw chye hkra ma hpe sharin shapan ai lam galaw ai, ndai zawn re ai magam bungli law law hpe azim sha ng anna san Yawsep galaw ai, ma a ahkaw ahkang ni hpe shi madaw la kau ya ai lam san Yawsep galoi n galaw ai, azim rai nga nna garum lakawn lam galaw ya let ma kaba kung zet wa hkra shi garum ya ai.
Kaga masha ni hpe lama ma galaw ya yang tsun garu lam ni galaw mayu chye ai anhte, ndai san Yawsep galaw ai lam ni hpe myit yu mai nga ga ai, tsun shatan lam ni galaw, aput angut nga nna tsun garu lam ni galaw nga na malai, azim rai yu lakawn lam galaw nna ma Yesu galu kaba kung zet wa u ga azim rai garum ya nga ra na rai ga ai.

Kanu kawa ni nkau mi ma ni hpe tsun marawn lam ni n galaw ai sha hpaji rawng ai masa hte bau maka ai lam ni galaw chye ma ai, ndai kanu kawa ni gaw, ma ni lama ma galaw shut ai lam ni nga wa yang kalang lata marawn jahtaw ai lam ni n galaw ai sha, aten jaw nna ma ni kaba kung zet wa na hpe ala la chye ai myit lai rawng ma ai.

Ma ni kaba kung zet wa hkra sharin shapan lam hta, tsun marawn jahtaw ai lam ni garai n galaw shi yang ala la na, aten jaw na ngu ai lam ahkyak nga ai” nga nna Wa Sarabyin hkaw tsun lai wa ai.

Source : Vatican News