San Joseph Mama Hpung Ni Myanmar Mungdan De Sasana Shang Ai ( 175 ) Ning Hpring Chyeju Dum Jubali Galaw

San Joseph Mama wuhpung ni Myanmar Mungdan de sasana magam gun na du shang wa ai ( 175 ) ning hpring chyeju dum Jubali poi hpe  Waimaw Muklum na San Joseph Nawku Jawng wang hta (01 May 2022 ) ya shani jahpawt hkying 10:00 aten  kabu gara awng dang ai hte galaw la lu sai.

Jubali galaw ai a yaw shada lam gaw ( 175 ) ning laman hta San Joseph Mama ni hpe Karai Kasang lak san shaman chyeju law law jaw ya sai majaw Karai Kasang hpe chyeju dum mayu ai lam re ai, grau nna yak hkak ai ten hta rai tim mung, awng dang ai ten hta rai tim mung Karai Kasang galoi mung garum ya nga ai majaw chyeju hpe shakawn shagrau mayu ai majaw ndai poi hpe galaw ai rai ga ai.

Jubali poi hpe ndai daram hkik hkam hkra lu galaw na ngu nna gaw n myit mada da ai. San Joseph Mama ni shang nna du shang wa ai gaw Mawlamyaing kaw re majaw dai kaw hkik hkam ai hku galaw na yaw shada da ai. Raitim mung Covid ana zinli a majaw mung, Mung masa n pyaw ai majaw nlu galaw mat ai majaw shawng nna Saradaw ginwang garan nna galaw ai lamang re lam Mama Maria Maran Munglen Ja Ra tsun dan ai.

San Joseph Mama wuhpung ni gaw Mawlamyaing kaw ( 1847 ) ning hta Mama marai ( 6 ) shawng du shang wa nna Myanmar Mungdan hta sasana galaw hpang wa sai re lam chye lu ai.

Jubali poi hta Myanmar Mungdan Kahtawlik Nawku hpung a saradaw kaba Cardinal Charles Bo, Wa Saradaw Francis Daw Tang, Wa Jau, Mama ni, Tarahkaw sara/num ni, buga na hpung masha ni hte shara shagu na nawku hpung masha ni law law sa du shang lawm ai hpe mu lu ai.

 

Shiga - Julia Ja Ing

Add new comment

2 + 0 =