San Columban Hpe Shagrau Ai Ginsup Poi Hpang Jahtum Gin Chyum Dat Lamang Galaw

Myitkyina Jau Ginwang Ramma Komiti ni woi awn galaw ai San Columban hpe shagrau ai hte Columban Jau Mama ni hpe chyeju dum ai masat dingsat ginsup poi lamang hpang jahtum Final ninggang kashun ai ni a gawdin poi hte kumhpa shagrau ai poi lamang hpe November shata 24, bat 6 ya shani galaw lai wa ma ai.

2019 October shata 21 ya shani kaw nna galaw hpang ai shata mi ram na sai ndai ginsup poi lamang hpe Myitkyina Edin San Luka Chyum Jawng Wang, ginsup pa hta galaw ai rai nna, hpang jahtum shani Edin  hte May Myint Ramma ni ninggang kashun ai poi hta Edin ni minutes 90 hpring nna aten shajan minute mi jaw da ai laman goal langai htawng bang lu ai majaw May Myint hpe langai kaman one ze (1-0) hte dang nna 2019 San Columban Masat Gawdin Ninggang hpe Edin ni dang la lu masai rai nga ai.Edin Ramma ni hku nna lahkawng ning matut manoi ninggang lu ai lam mung rai nga ai.

Hpang jahtum na shingjawng poi Final ginsup lamang ngut ai hte Ginsup hpan amyu myu hta nambat lu mat sai ni hpe kumhpa shagrau ai lam matut manoi galaw ma ai.Dai ning na ginsup poi lamang hta ginsup hpan mali hpe Myitkyina Jau Ginwang kata nga ai Mare Lawk 12 hte CSAM (c sam) ngu ai Myitkyina Kahtawlik Jawngma Wuhpung ni shanglawm shingjawng mat ai rai nna, Gawdin Htawng shingjawng ai hta nambat langai Edin, nambat lahkawng May Myint, Numbat masum Tat Kone, U-mun gayat shingjawng ai hta nambat langai Tat Kone, nambat lahkawng Du Kahtawng, nambat masum Lay Kone Ramma ni, Ka Din Shin Lone shingjawng ai hta nambat langai Du Kahtawng, nambat lahkawng Lay Kone, nambat masum Dap Kawng hte Num kasha ni a Futsal shingjawng poi hta nambat langai Tat Kone, nambat lahkawng Yuzana, nambat masum Edin Ramma ni lu mat ai lam chye lu ga ai.

“Lai sai ten a Columban shagrau poi hta Kanu kawa ni hte Ramma ni pawng nna galaw ai rai tim, dai ning gaw Ramma ni sha galaw ai, dai hta ya anhte Edin Ramm ni Awng dang lam lu la ai majaw grai kabu ai” nga nna Edin Lawk Ginsup hpung ningbaw Maji Brang Mun tsun lai wa ai.

“ Ra rawng ai lam gaw grai nga ai, ja gumhpraw kaw na hkawt Kanu Kawa ni atsawm garum ya ai, shang lawm sai kaw na gaw ninggam langai lu hkra shakut ra ai ngu ai myit hte ramma ni mung myit lawm let shakut ai majaw awngdang lam lu la ai re, anhte hte shingjawng ai May Myint ni grai hkrak ai, raitim anhte Edin ni shaman chyeju grau law ai majaw dang la lu ai lam re ngu mu ai’ nga nna Brang Mun matut tsun lai wa ai.

Dai ning na San Columban hpe shagrau ginsup poi lamang hta yawng hkum hkum ra ra hte lawk shagu hkan na Kanu Kawa hpung sara ni mung garum ai re majaw atsawm awngdang ai hte lu galaw ai  re lam Poi Komiti Ningbaw Slg Lahtaw Zau Awng tsun lai wa ai.