RVA Nsen Shapoi Dap Hpaw Hpang Ai (50) Ning Hpring Ja Jubilee Poi Galaw

Radio Veritas Asia (RVA) byin hpang wa ai labau kadun 

1950 ning jan hta Asia Dan kata communit ladat chyam bra hpang wa sai.Miwa gumsan mungdan,Dingdung Vietnam,Dingdung Korea ni hte,kaga mungdan nkau mi communit mungdan  byin wa sai.Ndai communit mungdan ni hta nawku jawng law law wan nat hkrum ai zawn,Karai a mungga hkaw tsun gat hkai nga ai sasana magam gun ni mung gau shapraw hkrum lai wa sai.

Asia Dan kata na nawku hpung hpe communit ni a lata kaw na makawp maga la na matu hte,Karai Kasang a tengman ai Mungga hpe Asia Dan masha ni yawng hpe ndut ndang hkaw tsun gat hkai lu na matu,(1958) ning December shata 10 ya shani,Philippines mungdan mare daju na Santo Thomas Dakkasu hta,nawku hpung ginjaw Vatican kaw na makam masham shachyam shabra hpung rung a lit hkam,Cardinal Agagianian hte Asia hte Australia dan hkan na Saradaw kaba ni (100) jan jahkrum bawng ban lai wa ma ai.

Ndai zup hpawng hta,Asia dan na mungdan yawng hpe chyam hkra Karai a tengman Mungga gat hkai lu ai Radio nsep shapoi dap, gaw gap na matu,Wa Sarabyin a dat kasa Cardinal Agagianian hpaji jaw tang shawn lai wa sai.Dai hpe du sa ai Wa Saradaw kaba ni yawng myit hkrum dawdan lai wa ma ai.

Ndai Radio  nsen shapoi dap hpe Radio Veritas Asai (RVA) ngu nna amying shingteng lai wa ma ai.Veritas ngu ai gaw Latin ga rai nna,tengman ai ngu ai rai nga ai.Dai majaw Radio Veritas Asia ngu ai gaw,Asia Dan hta tengman mungga shapoi nga ai Radio nsen shapoi dap ngu lachyum pru nga ai

Philippines mungdan gaw,Asia Dan hta langai sha re ai kahtawlik mungdan re majaw,Radio Veritas Asia nsen shapoi dap hpe,Philippines mungdan hta gaw gap na matu myit hkrum lai wa ma ai.

Radio Veritas Asia nsen shapoi dap gaw gap ai hta hkrat ang ai ja gumhpraw ni yawng hpe Germany mungdan kata na Kahtawlik nawku hpung hte Germany asuya ni lit la garum madi shadaw lai wa sai.Radio Veritas Asia nsen shapoi dap hpe Philippines mungdan Quezon mare hta,(1969) ning April shata hta shaman hpaw hpang la lu sai rai nga ai.

Radio Veritas Asia nsen shapoi dap kaw nna Asia Dan na mungdan ni de Karai a tengman mungga hpe shapoi nga ai rai tim,nsen shapoi hpang wa ai aten hta Myanmar mungdan na amyu sha ga ni hte shapoi ai lamang garai nlawm shi ai.

Dai aten Jinghpaw mungdaw hta sasana magam gun lai wa ai Columban Wajau ni rai nga ai Wa Saradaw Howe, Wajau Murphy yan hte Wa Saradaw kaba Pawlu Zinghtung Grawng ni gaw Myanmar Mung Saradaw kaba ni hte jahkrum bawng ban nna jawm atsam dat shakut lai wa ai majaw (1978) ning hta myen myusha ga ,(1982) ning hta Karen amyu sha ga hte Jinghpaw ga ni hku nna nsen shapoi hpang wa lu sai rai nga ai.