RVA Mobile Application Version Nnan Hpaw Poi Lamang Galaw

Radio Veritas Asia (RVA) Nsen Shapoi Dap a Mobile Application nnan version 2.0 hpaw poi hpawng lamang hpe dai ni 2021 October 11 ya shani Online lam yan hku nna galaw lai wa ai.

Hpaw poi lamang n galaw shi yang, Mobile App nnan hpaw ai chyeju dum Misa hkungga hpe mung, Yangon Sasana Sagurem wa, Wa Saradaw Kaba Cardinal Charles Bo hku nna Yangon St.Mary Cathedral Nawku Jawng kaba hta nawng jau ya ai hpe RVA shapoi taw nga ai ga hpan 22 a Facebook laika man ni kaw na mung kalang ta Live shapoi ya let galaw lai wa ai.

Cardinal hku nna “RVA Mobile Application hpe Karai Kasang a myusha ni rai nga ai hpu nau ni hpang de shachyen shabra ya lu ai majaw grai kabu nngai. Ndai Mobile Application gaw Asia dan hte mungkan ting na Karai Kasang a kashu kasha ni yawng matu rai nga ai. Madu Yesu Hkristu a shang lawt ai tsaw ra myit hte Kabu Gara Shiga rai nga ai teng man asak Madu a lam hpe mungkan masha ni kaw gat hkai bang ya ai lamang ni hpe ndai Mobile Application matut mahkai lam yan hku nna kaja grau ai ladat hku galaw ai ai lam rai nga ai.

Saradaw ni, Jau ni, Sasana wuhpung ni hta shang gawlaw nga ai hkungga ai hpu nau ni yawng ndai RVA Mobile Application hpe download galaw la lang nna tinang a Wenyi lam hta manang shatai la let masha shagu hpe mung anhte a sagu rem magam lam hte Kabu Gara Shiga hpe na la lu u ga matu garan kacyan sa wa ga ngu saw shaga mayu nngai.

RVA Mobile Application hpe Karai Kasang a myusha ni rai nga ai hpu nau ni hpang de shachyam shabra ya lu ai majaw grai kabu lu nngai. Ndai Mobile Application gaw shinggyim matut mahkai lam rai nga ai online mahkrun lam hku nna Asia Dan de Karai kasang Kabu Gara Shiga , teng man asak Madu Yesu Hkristu a shang lawt ai tsaw ra myit a lam gat hkai bang ya ai lamang ni hpe kaja grau ai ladat hku galaw ai lam rai nga ai. Madu a kabu gara ai shiga htawn shalai ai sasana magam bungli a  matu anhte ni prat dep matut mahkai ladat ni hpe lang ai lam rai nga ai” nga nna tsun lai wa ai.

Misa ngut ai hte hkying mi chyen na ai hpang Application hpaw poi  lamang hpe online hku nna san san bai galaw lai wa ai. Hpaw poi lamang hta Asia dan Saradaw wuhpung (FABC) a ningbaw Cardinal Charles Bo hte FACB malawm Saradaw Kaba ni, RVA ru reng uphkang ningbaw ningla ni, RVA hpe garum madi shadaw ya ai Catholic Media Council (Cameco) kaw na seng ang ai salang ni hte  RVA nsen shapoi dap ga hpan 22 kaw na Coordinator ni,  magam gun ni yawng Zoom Account 90 jan shang lawm lai wa ma ai.

"Madu a kabu gara ai shiga htawn shalai ai sasana magam bungli a  matu anhte ni prat dep matut mahkai ladat ni hpe lang ai lam rai nga ai”

Wa Saradaw Kaba Cardinal Charles Bo

RVA gaw Asia Dan na Saradaw Hpawng Daju “Federation of Asian Bishops Conferences (FABC) a lam woi matsun ai kata kaw galaw nga ai magam bungli langai rai nga ai hte maren ndai Mobile Application nnan hpaw poi hta FABC kaw na Saradaw kaba ni shang lawm nna kabu awlaw ai lam tsun shana lai wa ma ai. Dai hta Myanmar Mungdan na Saradaw Kaba, FABC ningbaw Cardinal Charles Bo (SDB),  Philippines Saradaw  Kaba Roberto Mallari (DD), Apostolic Vicar for Laos and Cambodia Saradaw kaba Olivier Michel Marie Schmitthaeusler, Mogolia kaw na Saradaw Giorgio Marengo hte FABC amu madu Wa Jau George Plathottam, SDB ni lawm ma ai.

“Ya na prat masa hta hkan nna ndai zawn prat dep ai hku sasana magam galaw ai majaw asia dan na masha ni, grau nna ramma ni Karai Mungga hte ni ni htep htep rai wa na re ngu kam ai, grai  n-gun lu a rawng la ai” nga nna Saradaw Kaba Michel Marie tsun lai wa ai.

RVA hpe madung madi shadaw ya ai Catholic Media Council kaw na mu gun hpung Director Michael Unland hku nna mung ‘ndai mobile app  kaw na anhte mahkrum madup nnan hte shada da akyu jaw hkat ai lam grau lu la na re, Asia dan na Kahtawlik sasana gaw Ginwang up jau ni hpe shamyet shanat let hpung masha ni hte ni ni htep htep tsun shaga kanawn ai hku madung galaw nga ai ratim ya ndai hku galaw yang kade daram masan sa ai ngu hpe anhte mu lu na rai nga ai, mayak manghkang lam ni gaw grai nga na re, raitim ndai gaw nnan hpang ai sha rai nga ai, anhte ni ndai kaw n jahkring  ai sha grau grau kaja ai ladat ni, Mobile app hpe grau hkum tsup ai hku galaw shapraw na lam ni hpe galoi mung myit ra nga ga ai” nga nna tsun lai wa ai.

“Ya na prat masa hta hkan nna ndai zawn prat dep ai hku sasana magam galaw ai majaw asia dan na masha ni, grau nna ramma ni Karai Mungga hte ni ni htep htep rai wa na re ngu kam ai, grai  n-gun lu a rawng la ai” 

Saradaw Kaba Michel Marie

Ndai RVA mobile app hpe India Mungdan kaw na hpaji ning hkring ni galaw shapraw ya ai rai nna dai ni hpaw poi hta Mobile app hpe galaw shapraw ya ai Ethiccoders  kaw na Sara Mr.Shibu Dvasia hku nna mung Mobile app a lam tsun sang lang mat wa sai rai nga ai.

RVA Mobile app nnan kaw shani shagu na Karai Mungga hte myit sumru lam lamang ni, myit sharawt lamang ni, bai nna Misa hkungga Nawku Daw Jau lamang ni, kasi la hpa shinggyim masha ni a lam, makam masham Nawku Hpung Labau ni, Nawku hpung a sharin  shaga ai lam ni, Nawku Hpung shiga hte Mungkan shiga, Buga shi ni hpe aten dep Amyu sha Ga hpan 22 hte yu madat la mai ai rai nga ai.

Radio Veritas Asia Mobile Application ningnan hpe ya dai ni October 11, 2021 ya shani kaw  nna Androind Phone lang ai ni Play Store kaw’ RVA Mobile App” ngu tam la nna bang la mai sai hte Apple iOS phone lang ai ni App Store kaw “ Radio Veritas Asia” ngu sawk tam nna download galaw la mai sai rai nga ai.

Thomas