RVA Jinghpaw Nsen Byin Tai Wa Hkra Shakut Ya Sai Wajau Colm Murphy Madu Hta Yup Pyaw Mat

Myanmar Mungdan Jinghpaw Mungdaw hta Sasana magam gun hpai lai wa sai Columban Jau Wuhpung na Irish Myusha rai nga ai Wa Jau Colm Murphy gaw October 20,2019 ya,Laban shani Ireland Mungdan,Columban jau ni ginjaw Dalgan kaw Madu Yesu hta yup pyaw mat sai lam chye lu ai.
Wa Jau a moi mang makoi mayang lamang hpe October 23,2019 ya shani Ireland Mungdan ahkying 11:00AM aten galaw na re lam chye lu ai.

Anhte a chyeju madu rai nga ai Wa Jau Murphy a matu (23,10,2019) hpawt de 6:00am aten St.Columban Cathedral,Aungnan,Myitkyina kaw Wa Saradaw Francis Daw Tang hte Wa Jau ni,hpung masha ni Missa Hkungga nawng ya ai lamang nga na re.

Wajau Colm Murphy gaw anhte RVA Jinghpaw nsen shapoi dap byin tai wa hkra shakut shaja ya lai wa sai chyeju madu mung rai nga ai.

RVA Jignhpaw Nsen Shapoi Dap Byin Tai Wa Hkra Shakut Lai Wa Ai Labau Kadau

RVA nsen shapoi dap hta jinghpaw ga hta nsen shapoi lu na matu shakut lajang ya lai wa ai gaw Columban jau Wa Jau Murphy rai nga ai. Wa Jau Murphy gaw Myanmar mung dan, Jinghpaw mung daw, Manmaw mare hta 8 ning nga nna sasana galaw lai yu ai jau rai nga ai. Ndai zawn rai jinghpaw mung daw hta 8 ning sasana magam gun hpai ngut ai hpang Wa Jau Murphy gaw Vatican TV ngu ai hkrang mu sen na hta Vatican radio lamang ni a lit hkam jau hku nna lit jaw hkrum lai wa ai. Ndai gaw RVA jinghpaw nsen shapoi dap byin tai wa na lam a npawt nan rai nga ai. Jinghpaw mung daw hta
shanu nga ai Wun Pawng sha ni hte Wa Jau Murphy a lapran myit dun tsawra hkat ai Wa Jau Murphy a tsawra myit kaba gaw Radio Veritas Asia nsen shapoi dap hta Jinghpaw ga hte nsen shapoi lu na lam hpe byin pru shangun lai wa sai rai nga ai.
Myu sha ga hte kabu gara ai shiga shapoi lu na Wa Jau Murphy a yaw shada myit mada ai lam hpe dai shaloi na Myitkyina ginwang up saradaw rai nga ai Wa saradaw John How hte bawng ban lai wa ai. Wa Jau Murphy hte Wa Saradaw John How yan myit hkrum lai wa ai hte rau ndai nsen shapoi na masing hpe Myanmar Mungdan na saradaw ni a madi shadaw ai lam hpe lu la na matu Wa Jau Murphy, Wa saradaw How hte Wa saradaw Pawlu Zing Htung Grawng ni shakut lai wa ma ai. Myanmar mung dan saradaw ni a madi shadaw ai hpe lu la ai hte rau myu sha ga hte nsen shapoi lu na tang shawn ai laika hpe dai shaloi na Philippines Mungdan Kawhtawlik nawku hpung a ning baw rai nga ai Cardinal Sin hpang de shalai dat ai. Tang shawn laika hpe Cardinal Sin hkap la myit hkrum ya lai wa ai hte rau Myanmar Mungdan hte hting bu mung dan ni rai nga ai Miwa Gumsan Mungdan, India hte Thai Mungdan ni de nsen shapoi hpang wa sai rai nga ai. Ndai labau shang nhtoi gaw 1982 ning August shata 20 ya shani rai nga ai.