Roma Saradaw Ginwang Kata Hta Deacon Marai (9) Hpe Wa Sarabyin Francis Hkum Nan Jau Shatai Ya Na

April 25, 2021, “Mission Sunday” Sasana Laban shani, San Peter Nawku Htingnu hta, jahpawt hkying 9:00 a.m, aten Decan marai (9) hpe Jau shatai Misa hkungga hpe Wa Sarabyin Francis woi awn na re lam chye lu ai.

Jau shatai Misa Hkungga hpe Vatican Media, Telepace, Tv2000 hte Roma Saradaw Ginwang a Facebook page ni hta live shapoi na re lam mung ndau da ma ai.

Lamang hpe gaw Covid-19 makawp matsun hte maren galaw sa wa na re lam mung “the Press Office of the Vicariate of Rome kaw nna ndau da ma ai.

Jau aya hkam la na Deacon ni gaw Jau tai dakkasu jawng law law kaw nna rai ma ai. Shanhte hta na marai (6): Georg Marius Bogdan, Salvatore Marco Montone, Manuel Secci, Diego Armando Barrera Parra, Salvatore Lucchesi hte Giorgio de Iuri ni gaw Sarabyin Rung kaw nna hpaw da ai Roma mare na Jau tai Dakkashu Jawng yu ni rai ma ai.

Roccardo Cendamo hte Samuel Piermarini yang gaw “the diocesan Redemptoris Mater College yu ai rai nna Mateus Henrique Ataide da Cruz gaw “Our Lady of Divine Love” Jau tai Dakkasu Jawng yu rai nga ai.

Jau Tai Dakkasu Jawng lung shara n bung ma ai rai tim, shaga la nna lata la ai lam gaw langai sha rai ma ai Deacon marai (9) a daw jau mayu ai myit kaba ai hkam sha lam mung shangai wa ai kaw nna nan masha ni hpe daw jau mayu myit nga ai lam Deacon langai sakse hkam tsun dan da nga ai.

Jau aya hkam la na Deacon ni hta asak mali shi (40) lahta de rai sai ni mung lawm nga ai. Asak mali shi jan sai Deacon langai gaw shi a asak (15) shaning hta sak kung sai masha hte rau Rosary hti akyu hpyi ai aten kaw nna nan Jau tai mayu myit rawng wa sai rai nna, asak kaba ten du hkra Jau tai na myit gaw n hkring mat ai sha matut shakut lai wa ai lam sakse hkam da nga ai.

Asak mali shi ning rai shai Deacon langai gaw shi a prat labau hpe bai htang yu dat ai rai tim, Jau prat de shaga la hkrum ai lam ni hpe chyu sha mu lu na re lam, dai Karai Kasang a tsaw ra ai hta kung hpan wa ai lam hpe mung jau ya nga ai, ngu sakse hkam da nga ai.

Nawku Hpung masha ni yawng ndai laban na Sasana Laban magam hta shang lawm let Vatican, San Peter Nawku Htingnu hta Jau aya hkam la na Deacon ni a matu mung akyu hpyi shang lawm nga ga ngu saw shaga let Vatican Shiga Dap kaw nna shapoi da ai hpe RVA Jinghpaw Nsen Shapoi Dap kaw nna bai ndau dat ya ga ai.

By Fr. Patrick Gawmaw Hkawng Yae

#vaticannews #rvakachinservice

Source : Vatican News