Roma Mare Up Hkang Rung Daju Capitoline Hill De Wa Sarabyin Sa Du Gawan

Roma Mare up hkang rung daju nga ai shara Capitoline Hill de, lai wa sai bat lahkawng ya shani Wa Sarabyin Francis sa du gawan nna, Roma mare up-hkang du Virginia Raggi hte magam gun ni hpe mungga shaga ai lam galaw lai wa ai.

Ya na zawn Roma Mare up hkang rung daju nga ai shara Capitoline Hill de Wa Sarabyin Francis a sa du gawan ai lam gaw, dai shara de Sarabyin ni hku nna sa du gawan ai 4 ngu na Sarabyin rai nga ai. Italy Mungdan ting hte, Mungkan Mungdan shara magup kaw nna du sa ai masha ni hpe hkalum, galung gahkyin ya ai shara byin tai hkra matut n gun dat shakut nga na matu tsun n gun jaw da ai lam ni Wa Sarabyin Francis galaw da lai wa ai re, nga ai.

Wa Sarabyin tsun ai hta, “shaning 2,800 ning jan na sai Roma Mare kaba a labau hta, Mungkan Mungdan shara magup kaw nna du sa wa ai masha amyu hpan hkum sum hpa hpe hkalum, galung gahkyin ya ai lam ni ndai Roam mare galaw lai wa sai, ndai Roma mare de du sa wa ai, Mungkan Mungdan shara magup kaw nna jawngma ni, akyu hpyi bu hkawm masha ni, mungkan bu hkawm masha ni, bu htawt hkawm masha ni, ndai ni yawng hpe hkalum la ai lam ni galaw nga ai a marang e, ndai Roma Mare kaba gaw masha yawng yawng e myit kap ai shara, sinpraw sinna dan langai hte langai hpe mahkri shawn ya ai shara byin tai nga ai rai nga ai.

 Ndai zawn galaw lu nga ai lam gaw, kabu gara ai shiga a n gun atsam, masha yawng a mai kaja ai akyu a matu mung up du ni hte Nawku Hpung ning baw ni a lapran magam bungli jawm jahpra gun hpai ai, shinggyim masha a sari hpe hkungga manu shadan ai, wang lu wang lang shang lawm hkawm sa lu na hkaw ahkang ni shabyin ya ai lam ni a majaw rai nga ai. Ndai Roma Mare kaba gaw Wenyi lam yan hte seng nna mung Mungkan ting na Kahtawlik hpung masha ni a matu ahkyak dik ai shara nan rai nga ai.

Roma Mare kaba a hkyik hkam tsawm htap ai ndai mabyin lam ni hpe lit nga ai up hkang du ni kaw nna matut thing hkang shatsawm jahtap nga ra na rai nga ai” nga nna Wa Sarabyin Francis kaw nna Roma mare up hkang du hte up hkang rung lit nga ai ni hpe tsun shadut n gun jaw da lam galaw lai wa ai lam Vatican shiga dap kaw nna shana dat nga ai.

Translated by : Father Bernard Dashi Tang Ji         

Source :Vatican News