Ramma Ni Hte Seng Ai Saradaw Ni A Hkumra Hpawng Hte Seng Nna Shiga Dap Ni De Tsun Sang Lang Ai Lam Galaw

Galaw ding yang rai nga ai ramma ni hte seng ai Saradaw ni hkumra hpawng ngut wa maga rai nga sai majaw, ndau shapraw na matu lajang nga ai ndau laika hpe gin chyum dat shatsawm jahtuk ai lam ni galaw nga ai rai nga ai. Dai ni hta, Saradaw ni a hkumra hpawng kaw nna ramma ni hpang de shagun jaw shana dat na laika mung lawm nga ai, ndai laika hpe hkumra hpawng hpum din dat ai shani, October 28 laban shani, hkumra hpawng shangut Missa hkungga hta hti shana ndau ai lam galaw na matu lajang nga ma ai re, nga ai.

Hkumra hpawng shang lawm nga ai saradaw ni kaw nna, shanhte a Mungdan na ramma ni a mabyin ni hpe shiga dap ni de tsun shana ai lam galaw dat nga ma ai. Dai ni hta Mungdan langai hte langai nbung ai mabyin ni mung lawm nga ai.

Cameroon Mungdan na saradaw Andrew Nkea tsun ai hta, “African dan na Nawku jawng shagu hta ramma ni hpring hpring shara she nshang hkra nawku sa ma ai. Raitim mung, mang hkang gaw, Nawku hta shanhte hkam sha lu ai kabu gara ai lam gaw ahkying hkum kachyi mi sha hkam nga ai, hpa majaw nga yang, Nawku jawng ni kaw nna pru wa ai hte rau yak hkak ai prat masa hpe lai di ra ai, kan bau bungli madung nlu ai, tsi mawan nnga ai, majan mang hkang hte matsan chyaren re ai masa hta sak hkrung nga pra nga ra ma ai majaw rai nga ai” nga nna tsun dat nga ai.

Poland Mungdan na saradw Grzegoze Rys tsun ai Poland Mungdan na ramma ni a mabyin gaw, “ramma ni Nawku jawng nsa ai masa gaw nrai nga ai, ramma ni kaw na ka-ang hkup daram gaw nawku jawng man man sa, mara raw Sacramentu ni hpe man man hkam la ai lam ni galaw ma ai, raitim mung, ndai zawn nawku jawng man man sa ai ngu ai lam hta ndai ramma ni madu yesu hpe atsawm chye ma ai ngu ai masa gaw nrai nga ma ai. Kaji daw shaning 10 ning 12 ning daram tara laika sharin hkam la lai wa ma ai ni rai ma ai raitim, Karai Kasang kaja wa ai nga ai masa shanhte nmu mada nga ma ai.

Ramma ni hku nna makam masham hpe law law nchye na ma ai. Shanhte a prat hta ahkyak madung manu shadan ai lam ni gaw hpa ni rai ta ngu nna ramma ni hpe lama san yang, kun ding hku ngu ai gaw ahkyak ai manu dan ai lam re, ngu nna htai na ma ai, raitim mung makam masham ngu ai lam hpe jahtum htum pa daw de sha tawn da ai hpe myit npyaw hpe mu lu na rai nga ai.

Ga shadawn tsun ga nga yang, Nawku hpung a ahkyak ai poi lamang ni rai nga ai Paska poi hte hkristmat poi ni hpe, makam masham hte seng ai ahkyak ai nawku lamang ni re ngu ai masa shanhte nmu mada ai sha, kun ding hku dum nta masha ni jawm hkrum zup lu ai aten lamang ni ngu ai masa she mu mada nga ma ai, ndai zawn tsun nga ai lam gaw ramma ni hpe mara shagun nga ai lam nrai, myit yu na matu ahkyak ai lam ni re ngu ai masa she rai nga ai” nga nna Poland Sardaw tsun dat nga ai Vatican shiga dap kaw nna shana da nga ma ai.  

Source : Vantican News