Ramma ni hte Mung masa mabyin hte byin wa chye ai Mung masa mayak lam bawngban hpawng galaw ai shiga

Myitkyina Saradaw ginwang, Simsa lam hte Tara rap ra lam commission (Justice and Peace) kaw nna woi awn let, Mung masa mabyin hte byin wa na mung masa mayak lam ni hpe myi shahpaw dan na matu hte ramma ni kaw, hkam sha ai lam tsun dan mayu ai lam ni hpe Nawku hpung hpe tsun dan let, Nawku hpung kaw nna gara hku garum lu na ngu ai lam hte seng nna bawngban hpawng hpe (10.5.2021) ya shani Myitkyina San Columban Nawku jawng wang, htap masum mungbawng htingnu hta galaw lai wa ai.

Ndai hkrum zup hpawng hte seng nna yaw shada lam hpe woi awn galaw ai Simsa lam hte Tara rap ra lam Commission (Justice and Peace) lit hkam Wa Jau Vicent Zinwa Shan Lum tsun ai hta “Ya ten Mung masa mayak ten hta Myusha ni a mayak ten, Ramma shagu gaw myit hta shim lum ai lam nnga na re. Myit hta hkrit tsang nga ai hte hpawn nkau Ramma ni gaw grai myit rawt nna pawt ai lam ni nga na re.

Ya ten hta shanhte hta hkam sha lam ni shaloi na hte nbung nga ai. Ndai ten hta e Nawku hpung hpe shanhte tsun dan mayu ai lam ni, Nawku hpung kaw e myit mada ai lam ni law law nga ai. Ndai lam ni hpe shapraw dan na matu hkrum zup bawngban ai lam rai nga ai.”

Ndai Simsa lam hte Tara rap ra lam Commission (Justice and Peace) ni woi awn galaw ai ramma zuphpawng hta Myitkyina Jau Ginwang Ramma ni hte galaw ai re lam chye lu ai.

#aungnan

#rvakachinservice