Putao Jau Ginwang, Nwai Baw Mare Na San Petru Nawku Htingnu N'nan Shaman La Lu Sai

Kahtawlik Sasana, Myitkyina Saradaw Ginwang, Putao Jau Ginwang, Nwai Baw Mare, San Petru Nawku Htingnu shaman akyu pyi poi hpe 2021, April 17, bat kru ya shani Karai Kasang a shaman chyeju hte angwi apyaw galaw la lu sai lam chye lu ai. Wa saradaw Francis Daw Tang (Emeritus/ hkring sa) kawn Misa Hkiungga nawng jau let Jau marai masum shang lawm shaman la lu sai rai nga ai.

Nwai Baw mare gaw Putao kaw na den 16 tsan ai rai nna, Machyan Baw myo, Nbu baw ninghtawn kaw lawm ai mare rai nga ai.

Putao Ginwang Up Wa Jau John Hpung Shang Awng Htoi a matsun woi awn la ai hta Nwai Baw mare lit hkam Sara Peter Hking Jawng La Ja lit la gaw gap hpang wa ai rai nna, Nawku Jawng gaw gap committee ni e ta tut magam hta shang lawm galaw let gaw gap la lu ai re lam chye lu ai.

Nawku Jawng gaw gap hpang ai gaw 2019, September shata kawn gaw gap hpang wa nna, 2021 April 17 ya shani ding shawn shang akyu hpyi shaman ai lam galaw lai wa sai rai nga ai.

Hpung masha kun dinghku shagu na laksan alu lahkawn hpang nna, ginwang up wa jau kawn saradaw ginwang project director wa jau Peter Tu Hkawng kaw garum hpyi ai hte maren America mungdan kaw nga ai Slg. Columban Labu Mung Ra hte Jan Lucia Wa Ga Ja Bu dum nta masha e matut garum ya ai hte buga hpung masha ni a alu hte shawa n-gun hte gaw gap da lu ai re lam lit hkam Sara La Ja tsun dan ai hte maren chye lu ai.

“Nawku Jawng gaw gap la lu na matu alu jaw bang garum ya sai chyeju madu ni yawng hpe galoi mung myit dum akyu hpyi ya nga ai. Alu madu ni garum ya ai alu hte shadawn sharam let hpung masha ni shawa n-gun atsam dat lai wa ma sai re majaw buga hpung masha ni hpe mung chyeju dum ai hte shakawn mung grai shakawn ai. Ginwang Up Wa Jau John Hpung Shang Awng Htoi a lam matsun n-gun jaw madi shadaw ya ai a majaw Nawku Jawng hpe gaw gap la lu ga ai re majaw mung Ginwang Up Wa Jau hpe mung buga hpung masha ni yawng a malai chyeju dum ai,” ngu lit hkam sara kawn chyeju dum ai lam RVA Shiga Dap de tsun da nga ai.

Nwai Baw mare hta nawku Hpung masha hting gaw 11 sha nga ai rai nga ai. Nwai baw mare hpe 1948 shaning hta N-nang hting gaw ni, N-yat hting gaw ni, N-dup hting gaw ni, N-hka hting gaw ni e shawng woi de hpang ai re lam chye lu ai.

Kahtawlik Hpung masha ni nga hpang ai gaw 1972 hta bum ga kaw na yu wa ai masha ni hpe shinggyin ai aten kaw lawm wa ai kaw nna nga hpang wa ai rai nna, 1982 shaning aten kaw nna hpu nau hpung kaw nna hting gaw 18, masha hkum ding 80 jan daram Kahtawlik makam masham de gale shang wa ai re lam chye lu ai. Dai aten gaw Ginwang Up Wa Jau Karen Gam Awng rai nna, mare lit hkam Sara gaw Sara kaba Yawhan Hking Jawng Awng re lam chye lu ai.

Hpang daw de galaw lu galaw sha yak hkak ai lam ni nga wa ai majaw Nwai baw mare kaw nna mali hka hku de bai htawt sit mat ma ai majaw ya aten hta nawku hpung masha hting gaw 11 sha re ai lam mung chye lu ai.