Putao Hta Covid-19 Laja Lana Byin Nga

Covid-19 a majaw Putao hta asak si sum ai ni law wa nga ai lam chye lu ai./Sanlu

Putao Maga de October shata htum wa maga ten kawn kalang bai numdaw 3 hku nna byin hpang wa ai Covid-19 gaw ya ten laja lana byin wa ai majaw Mung masha ni yak hkak nga ma ai lam chye lu ai.

 

Ana n chyam bra lu hkra makawp ninghkap ai lam mung n lu galaw ai ai hte Covid-19 kap hkrum machyi masha ni hpe gawn lajang ai lam hta mung ra rawng ai lam ni nga majaw asak sum ai ni mung law law nga ai lam  buga masha ni tsun ma ai.

 

Mare Uphkang Wuhpung ni kawn Gawdin Ginsup na ahkang jaw nna shanhte nan lawk hte lawk gawdin ginsup poi lamang ni galaw woi ai kawn ya na zawn Covid-19 kap bra ai lam grau sawng  wa ai re nga nna mung Mare masha ni tsun ma ai.

 

“Ndai lapran na lu ai shiga hte maren nga yang, Tsi Rung hkan mung Covid machyi masha tawn na shara she nshang hkra law ai, Putao, Mashang Baw, Mulashi Di Mare ni yawng hkan ana chyam bra taw ai, Asak kaba ai ni hte aten galu ana yawga machyi masha ni gaw asak si sum mat ai lam na chye lu ai, n kau ni gaw Covid-19 Positive byin tim kadai hpe n shana ai sha tinang nta kaw sha a tsin rai nga taw ai ni mung law law re, gawn lajang ai lam hta mung tang ndu ai hpe mu lu ai”

nga nna Putao Ginwang Up Wa Jau John Awng Htoi tsun lai wa ai.

 

Nkau Mung masha ni gaw Covid makawp ninghkap tsi htu nna Mare hpe koi yen let nga taw ai ni mung ai lam, Mare up hkang rung ni kawn mung ndai masa hpe a tsawm hparan hpareng ai lam n lu galaw ai, tsun ga nga yang tinang n sadi yang tinang sha machyi hkam ai hku masa re, asak kaba ai ni lani mi marai 2,3 si ai lam Mare masha langai tsun lai wa ai.

 

“Putao Mare hta Oxygen jaw lu ai shara mung nlaw ai hte tsi lajang ai lam hta mung yak hkak nga ai lam, Ndai Covid kapbra ana hpe makawp lu na matu gaw marai hkum din dek shagu sadi maja let nga jang she ninghkap kau lu na re ai lam, Putao hta ya ten du hkra ladaw grau katsi wa ai de du wa sai re majaw n-gup magap ni a tsawm lang nna sadi maja let hkawm sa ga” nga nna Wa Jau Awng Htoi matut tsun lai wa ai.

 

Putao Ginwang hta nga ai mung masha yawng a matu hkamja lam hte seng ai gawn lajang ginra tsi rung hpe garum ningtum wuhpung ni kawn ta tut gawgap galaw sa na matu hkyen lajang nga ma ai lam chye lu ai.

 

Thomas

Add new comment

5 + 1 =