pru htawt hkawm masha (Refugees) ni hpe garum ya na matu hpyi lajin ( 16 March, 2020 )

Nawku Hpung Shiga

Kahtawlik saradaw ni hte Lutheran saradaw ni jawm pawng nna pru htawt hkawm masha (Refugees) ni hpe garum ya na matu hpyi lajin da ai shiga.

Uropa dan kata na htunghking maka bung ai ni jawm hpawng de ai Scandinavia wuhpung hta lawm ai mungdan shagu na kahtawlik saradaw ni the Lutheran saradaw ni gaw hpyen tsinyam hkrum nna mungdan kaga de pru htawt hkawm sa nga ai (refugees) ni hpe garum ya na matu, Uropa dan kata mungdan shagu na ningbaw ningla ni hpe, March 9 hta,hpyi sawn da ai lam chye lu ga ai.

Tinang mungdan kata majan a tsinyam hta simsa lam nnga ai majaw pru htawt sit hkawm ai masha ni hta Syrian refugees hkying kaba masha ni gaw Europe de lai sa wa na matu Greece hte turkey mungdan lahkawng a jarit hta chyam chya yak hkak lam hkrum nga ma ai rai nna; shanhte a mayak lam ni a majaw mungdan kaga ni hta simlum shingbyi lu na matu hypi sawn na shinggyim ahkaw ahkang nga ai.

Dai majaw zingri hkum nna hprawng pru htawt sit shang wa ai refugee masha ni hpe garum la na matu, Uropa dan kata na mungdan ningbaw ni hta tara lam yan hku mung, shinggyim nga sa lam yan hku mung lit kaba nga ai lam shadum shadan shalen nna hpyi sawn da ya ma ai.

Scandinavia hta lawm ai saradaw ni gaw Denmark, finland, Iceland, Norway the Sweden mungdan kata na kahtawlik saradaw ni the Lutheran saradaw ni rai ma ai.

Yak hkak jamjau lam hpe yawng a lahpa jawm pawng nna jawm hpai shingtau la hkat chye ra ai nga nna ngun jaw da ma ai. ndai lam hta hkrat sum yang gaw, anhte a shinggyim masha lailen kaja hpe shamat kau ai tai wa na re nga nna matut tsun da ma ai.

Mungdan jarit ni hpe pat da ai lam hte hprawng htawt sit hkawm ai ni hpe jep sagawn nga ai lam gaw kaja dik ai mahtai nre ai hpe dum chye ai saradaw ni gaw “majan bying ai hte matsan jamjau hkrum nna hpawng pru htawt sit hkawm ai ni sak hkrung nga pra lu na matu anhte ni yawng hta lit nga ga ai” nga nna tsun shadun da ma ai lam hpe march shata 14 ya shani Vatican shiga dap kaw shana da ai shiga hpe RVA Kachin service kawn htawn shalai shana da ga ai.