Prat N-nan Gaw Gap Ginra Masat Yang (9) Bai Hpaw Hpang

Myitkyina Kawhtawlik Sasasan Kaw nna hpaw tawn da ai Chyet Pawng Shan Lawk na “ Prat N-nan Gaw Gap Ginra” (Rebirth Rehabilitation Center) Masat Yang (9)  hpaw hpang wa sana re ai lam chye lu ai.

N-dai masat yang (9)  hpe 2019 January 8 ya kaw nna April shata 23 ya shani du hkra shata mali tup lung ra na rai nna, shara shagu hkan nga ai Nang Hpam Malu Masha sha ai ni,nam hpam malu masha hpe tsep kawp dawm kau mayu ai ni  kadai raitim Amyu Hpung N-gin hka sa du tsi lajang la mai ai lam, mying jahpan ni hpe 2019 January shata praw 8 ya kaw nna 15 ya shani hpang jahtum da hkap la na re ai lam laika htuk shapraw dat ma ai.

Sa du tsi lajang la mayu ai ni gaw :-

-Ginwang Up Jau (shing n-rai) Hpung Tau Hpung Sara/Saranum (shing n-rai ) Pat Jasan Komiti ni kaw na madi shadaw laika,

-Jawng Shang Shabrai -40000 Ks (Mun Mali)

-Shata shagu na shabrai – 40000 Ks (Mun Mali) hte

-Tsi manu -25000 Ks , yawng rai  yang nnan shang ai shata hta 105000 Ks (Sen mi hkying manga) tup bang ra na rai nna, hpang na shata ni hta  tsi mawan hte malu masha a matu 40000 Ks (Mun mali) hpe shata shagu bang ra na re ai lam chye lu ga ai.

N-dai Prat N-nan Gaw Gap Ginra hpe Myitkyina Saradaw Ginwang Ka Ni Nanghpam Pat Jasan Komiti kaw nna lit la ai hte 2015 ning hta hpaw hpang ai rai nna ya  masat yang (8) jawng yu poi hpe lai wa sai 2018 November shata 12 ya shani galaw ai hta jawng ma (nam hpam malu masha sha ai masha ) 38 tup tsi lajang la lu sai re , masat yang (8) jawng yu poi hte rai yang nang hpam tsin yam hkrum masha marai 198 hpe shapan shalat prat nna prat nnan gaw gap ya lu sai rai nga ai.

Ya ten hta Columban Sasana Hpung kaw na Wa Jau Eamom hte Ma Ma Ashwena woi awn let, La Salette Ma Ma ni hte staff marai 16 lit la galaw nga ai rai nna, sa du tsi tsi hkam la ai jawng ma ni hpe Karai Mungga hte rau  tinang myitlawm ai ginsup lamang ni hte myit jasat hte seng ai hpaji ,Wenyi  lam ni hpe sharin ya nga ai lam chye lu ga ai.

Jawng de sa lung na ni la sa wa ra ai arung arai ni-

• Tinang a  bu hpun palawng kahti galai
• Yupra, baw hkum hte hpun n ba, sut
• Ginsup Bu Hpun Palawng,Hkyep Din (Jarcy)
• Jinghpaw Labu hte Palawng ahpraw
• Hkashin sapya,wa htu tsi, wa htu tan,Hka Kawk
• Chyum Laika hte Nawku Mahkawn Mangwi Buk
• Passport size sumla 2 la sa wa ra na re.

Matut Mahkai na hkringdat : Phone -09252547503 (Rung), 09423308940 (Sr.Ashwena) , 09257983074 (Sara Hkaw Zung), 09778165748 (Sarama Rita)

Thomas Mung Hpan