PLN Jau Ginwang Hta Mung Covid-19 Hkye Mawai Ginra Hpaw Da Lu Sai

PLN jau ginwang, ginwang up Wa Jau Noel Naw Lat lam woi awn ai hte rau PLN St.Joseph nawku jawng wang hta Covid ana jep ya ai lam hpe ( 16/8/2021 ) ya shani kawn hpang nna bat 1 - 5 ya laman, shani shagu jahpawt 9:00 – 12:00 Noon du hkra myu hpung n gin hka ai sha ana jep ya taw ai rai nga ai.

Covid ana kap hkrum ai buga masha ni a yak hkak ai lam law law nga ai hpe mu mada lu ai majaw ninghtoi ( 25/8/2021 ) ya shani,St.Joseph Covid – 19 hkye mawai ginra hpe shaman hpaw hpang nna Covid ana kap hkrum ai machyi masha ni hpe nga shara lajang ya ai hte tsi tsi shamai ya ai lam hpe galaw ya nga sai.

Yak hkak ai masha ni a matu yaw shada nna hpaw da ai re majaw kadai hpe mung manu jahpu n la ai sha, ana jep ai hte tsi tsi shamai ai lam ni galaw ya nga ai.

PLN jau ginwang gaw jau ginwang hpaw hpang ai shata 4 sha naw re majaw jau ginwang hta ra kadawn yak hkak ai lam ni law law nga ai raitim buga masha ni a matu ra ahkyak taw ai Covid hkye mawai ginra hpe hpaw ai re lam ginwang up Wa Jau tsun ai.

Ya aten machyi masha ni hpe htaw wa htaw sa galaw na matu lak san mawdaw (Ambulance ) grai ra ahkyak nga ai majaw mai byin ai ni garum shingtau la na hpe ginwang Wa Jau garum hpyi dat nga ai.

Shiga - Jullia Ja Ing