Philippines Mungdan de du nga ai San Pra ai Padre Pio a n-hten n-yat ai salum hpe hpung masha ni law law sa du hkungga akyu hpyi ai lam ni galaw

Philippines Mungdan de du nga ai San pra ai Padre Pio a n-hten n-yat ai salum hpe hpung masha ni law law sa du hkungga let akyu hpyi ai lam ni galaw nga ma ai.

“Jan ja ai aten mung nga, marang htu ai aten ni mung nga ai raitim, Phillipines Mungdan hpung masha ni ahkying hkum law law la nna,San Pra ai Padre Pio a n-hten n-yat ai salum hpe mu mada hkungga akyu hpyi ai lam galaw lu na matu hkam sharang let shakut nga ai hpe mu ai majaw hpung masha ni a makam masham hkyik hkam kaba nga ai lam hpe kaabu gara mu mada lu ai,” nga nna ndai San Pra ai Padre Pio a n-hten n yat ai salum hpe lakawn thing hkang lam galaw na matu hkan nang sa wa ai Italy myo sha, Capuchin Jau lahkawng hta na langai rai nga ai Jau Giovani Delle Carri tsun dat nga ai.

Matut nna Jau Carri tsun ai hta, “ya na zawn sa du hkungga akyu hpyi ai masha ni hta ramma ni law law hpe mung mu mada nga ai majaw grai yu n-gun lu nga ai. Hkritian Mungdan rai nga ai ndai Philippines Mungdan na ramma ni a makam masham kaba nga ai lam hpe mu mada ai majaw myi prwi si she hkrat na daram myit masin hta myit kahpra hkam sha lam byin pru nga ai. San Pra ai Padre Pio hpe hkungga shagrau ai hku nna Karai Kasag hpe shakawn shagrau ai lam galaw nga ma ai Philippines Mungdan hpung masha ni a makam masham gaw hkyik hkam kaba dik nga ai, San Pra ai Padre Pio a n-hten n-yat ai salum hpe chyahkring mi mu mada dat lu na matu ahkying hkum 6 daram jan ja marang htu nga ai lapran myit galu kaba ai hte ramma ni law law a-la dingda nga ma hpe mu lu nga ai” nga nna Jau Carri tsun dat nga ai.  

Lai wa sai bat masum ya shani, Manila Nawku htingnu kaba hta sharawt shagrau tawn da ai San Pra ai Padre Pio a n hten n-yet ai salum hpe hkungga akyu hpyi ai lam galaw lu na matu kata de nlu shang ai majaw, hpung masha ni hkying kaba Nawku htingnu shinggan kaw la nga ma ai rai nga ai, Nkau mi gaw Missa hkungga lawm nga ma ai hte, masha law law mung mara raw Sacramentu ni hkam la let san pra ai Padre Pio a salum hpe mu mada dat lu hkra shajin nga ma ai ni mung law law rai nga ma ai. San pra ai Padre Pio a salum ndai Manila Nawku htingnu de garai ndu shang saw a shi yang Batangas ngu ai Mare hta mung, bai Manila kaw na Santo Tomas ngu ai Dakkasu Jawng hta mung lana mi hpra hkring sa sai hte dai shara ni hta mung hpung masha ni law law sa du hkungga akyu hpyi ai lam galaw lai wa ma ai.

San Pra ai Padre Pio a n-hten n-yat ai salum gaw October praw 5 ya shani Philippines Mungdan de hpai du shang sa wa ai rai nna, October 26 ya shani de hkra nhtoi 20 ya tup Philippines Mungdan mare Kaba law law ni de hpai gawoi sa ai lam ni galaw nna hpung masha ni hkungga akyu hpyi ai lam ni galaw lu na lajang ya nga ai rai nga ai, nga nna CBCP Philippines Mungdan Kahtawlik Saradaw uhpung a shiga dap internet laika man hta ka shana da nga ma ai. 

Source : CBCP News