Philippine Mung Masha Ni Hta Na Shawng Ningnan Nobel Peace Kumhpa Lu La Ai Maria Ressa Hpe Philippine Saradaw Ni Shagrau Ai Shiga

Philippine mung masha, asak 58 ning rai sai, Maria Ressa gaw  Nobel Peace kumhpa shagrau hkrum na wa re, ngu Norwegian Nobel Committee kawn October 8 ya shani ndau shana dat ai majaw, Philippine Saradaw Hpawng Kaba, The Catholic bishops of the Philippines (CBCP)  kawn laksan shagrau ma ai lam chye lu ai.

Maria Ressa gaw “to safeguard freedom of expression”, hkam sha lam hpe shanglawt ai hte wanglu wanglang tsun shapraw lu na matu makawp maga ai lam” galaw shakut shaja ai wa rai nga ai.

“Hkam sha lam hpe shanglawt ai hte wanglu wanglang tsun shapraw lu na matu makawp maga ai lam hpe galaw shakut nna Nobel Peace kumhpa hpe hkam la lu ai, Maria Ressa hpe shagrau sha-a ai hku nna anhte, hpung woi ni mung mungdan ting a malai, shi shagrau ga ai lam nsen shapraw jat dat ga ai,” ngu Philippine Saradaw ni, shi hpe shagrau let ndau shana da ma ai.

“Anhte a Wa Sarabyin ni gaw, hkam ja ai, shang lawt ai, teng man ai, democracy lu ai wuhpung wuhpawng hpe gaw de na matu n-gun jaw da ma ai hte maren, Nawku Hpung kawn, dai zawn shakut shaja ai ni hpe masat masat galaw, shagrau sha-a ai lam gaw mau hpa n rai nga ai, galaw ra ai lam rai nga ai,” ngu Saradaw Kaba Archbishop Valles, shi a ndau laika hta tsun da ai.

Philippine Mungdan Gumsan Magam, President Rodrigo Duterte a nanghpam dut mari, lu sha ai ni hpe jeyang ai ladat gaw masha sat amu ni, zingri zingrat di ai amu ni re majaw, shinggyim tara tawt lai ai ladat re ngu ninghkap ai majaw ningdang kalang hkat na zawn re ai masa ni lapran, nanghpam majan gasat policy hpe adawt ai wa ngu ai tara hta hkrum ai Rossa gaw tara masa lam hte seng nna amu jahta san jep hkrum ai lam law law hpe hkrum nga ai wa rai nga ai.

Ressa galaw nga ai, “hkam sha lam hpe shanglawt ai hte wanglu wanglang tsun shapraw lu na matu makawp maga ai” hpe “Philippine online news website Rapler” kawn garum ndau shabra ya nga ai re ngu, Nobel Committee ni tsun dan da ma ai.

Ressa gaw ndai zawn “hkam sha lam hpe shanglawt ai hte wanglu wanglang tsun shapraw lu na matu makawp maga ai lam” hpe n hkrit n kang rai galaw nga ai wa rai nga ai.

  N tara ai hku masat sat ai amu gaw, Philippine mungdan kata hta, majan byin ai shaloi si htum mat ai hte bung ai masha madat si hkrum nga ai sakse ni nga nga ai lam Nobel Committee kawn matsing da ma ai lam mung chye lu ai.

Ressa hpe Nobel Peace kumhpa shagrau na matu Nobel committe kawn lata san da ai lam ndau ai hpang masum ya ngu na nhtoi hta Philippine Mungdan Gumsan Magam, President Godrigo Duterte hkum nan Philippine Mungdan Asuya Rung Daju kaw sa wa ai lam, hpang hkrat nna she shagrau laika ka shagun dat lu lam, Mungdan Gumsan Magam a malai tsun shaga ahkaw ahkang nga ai, Harry Roque, bat langai ya shani, shiga hta tsun dan da nga ai.

“Ndai kumhpa gaw Philippine mung shawa masha ni a awng dang lam kaba langai rai nga ai. De a majaw kabu aw law ga ai,” ngu matut tsun da nga ai.

Rai ti mung, Ressa gaw Cyber tara tawt hpe tawt lai ai wa, cyber hpe jahprak ai wa re ngu ai tara hta hkrum nna, amu jahta ra taw nga ai re lam chye lu ai.

Shi gaw Philippine mungdan shiga hpawng ni hte shi ndau mahkrun lam ni hpe dingbai dingna jaw ai lam langai mung n nga ai, jahkrit shatsang ai lam mung n nga ai ngu ga htang da ai re lam chye lu ai.

Shaning (30) lahta hte shiga dap hta magam gun sai Ressa gaw online mahkrum lam ni hta n jaw n teng ai shiga ni hpe shabra ya ai shiga dap ni hpe aja awa ninghkap lai wa sai wa mung rai nga ai. Teng ai, jaw ai shiga ni hpe ndau na malai, masu magaw ai, pawt sindawng ai, manawn masham ai shiga ni hpe lawan ladan shi shabra ndau ai lam hpe mung aja awa ninghkap ai wa rai nga ai.

Dai majaw mung, lai wa sai lahkawng ning laman hta Philippine Asuya kawn, shi hpe rim na matu (10) tup matsun laika shapraw sai lam laika hte hkrak masat sakse nga ai lam, Rappler shiga shapoi dap hte san htai, ninterview hta tsun dan da ai lam chye lu ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/church/news/2021-10/philippines-bishops-congratulate-ressa-nobel-peace-valles.html

 

Add new comment

4 + 3 =