Philipphines Mungdan Hta, " Black Nazarene " Makam Masham Poi Kaba Galaw Hyen Lajang Nga Ai Shiga

Shaning shagu January shata praw 9 ya shani galaw ai ‘Black Nazarene’ ngu ai Philippines mungdan a kaba dik ai makam masham poi kaba hpe simsa ai masa hte atsawm sha galaw lu hkra mungdan asuya hte makam masham ning baw ni ta gindun let hkyen lajang nga ma ai rai nga ai.

Shaning shagu Philippines mungdan masha ni wan lam hte ru nna shang lawm ai poi kaba rai nga ai majaw, poi galaw na shara Manila grup yin hta ya kaw nna asuya pyada ni law law jahkrat let shim lam a matu lajang nga masai rai nga ai.

Iran mungdan a hpyen du kaba Qasem Soleimani hpe American ni nbungli bawm hte kapaw sat kau ai mabyin a majaw, shim lam a matu grau tsang shara shiga ni pru nga ai, nga nna Philippines mungdan shim lam pyada ni kaw nna tsun ndau da ai lam mung nga nga ai.

“A hkaw ahkang la nna jahten sharun galaw ai lam ni byin pru wa lu mai ai majaw shim lam a matu pyada n-gun 10,000 daram hpe Manila grup yin hta shara jahkrat da sai” nga nna Philippines mungdan shim lam pyada du kaba Francisco Gamboa tsun dat nga ai.

“Black Nazarine” ngu ai gaw nsam achyang re ai Madu Yesu, lahput hpundi nna udang hpai nga ai sumla rai nga ai. Ndai sumla hpe hpai shing grup let akyu hpyi lam galaw ai poi rai nga ai. Ndai poi hpe Philippines mare daju Manila Quiapo na Black Nazarine nawku jawng kaba hta galaw ai. Lai wa sai shaning hta ndai hpai shing grup akyu hpyi lamang galaw ai hta mung chying sha ni wan lam the ru nna shang lawm lai wa ma ai hte ahkying hkum 22 jan na lai wa ai re nga ai.

Ndai poi lamang nga ai majaw Jan praw 9 ya shani hta Manila mare kaba ting na laika sharin jawng ni yawng hte asuya rung ni yawng pat da na re lam hpe mung asuya lit nga ai ni kaw nna ndau shana da sai rai nga ai.

1787 ning hta ndai Black Nazarine ngu ai sumla hpe moi asuya rung dung lai wa ai Manila myo mare dingsa Augustinian nawku htingnu kaw nna Manila Quiapo nawku htingnu kaba de hpai sit shara htawt nawt lam galaw ai lam hpe myit dum galaw ai poi lamang rai nga ai, nawku jawng shingan de ndai sumla hpe hpai gawoi akyu hpyi lam hpe 2007 ning kaw nna galaw hkrat wa ai rai yang dai ning na lamang gaw 13 lang ngu ai poi lamang rai nga ai, nga nna Ucan shga dap kaw nna shana dat nga ma ai.               

Source - Ucan News

#churchnews

#rvakachinservice