Panghkak jau ginwang kata Ramma Sharin hpawng galaw lai wa sai shiga!

Manmaw sasana panghkak jau ginwang kata ramma sharin  hpawng August 25 ya shani kaw nna 30 ya shani du hkra Panghkak jau ginwang Loi Je San.Pawlu Nawku jawngwang hta galaw lai wa sai lam Teresa Sumlut Hkawn Bu shiga jaw ai hku nna chye lu ai.

Ndai sharin hpawng hta 2019 / 2020 hpaji ladaw hta tsang Shi (10) sanpoi awng ai ni hte dakkasu lung nga ni hpe madung da let galaw re lam mung chye lu ai. Ndai sharin hpawng hpe August 25 ya shana ramma ni du zup hpawng let lamang hpe Prang hkudung ginwang up Wa Jau Columban Labang Lar Di hku nna hpawng hpe hpaw hpang ya sai.

Aug 26 ya shani Wa Jau Columban Labang Lar Di kaw nna chyum laika hte nawku dawjau lam, Jau Mama ni a ga sadi lam hpe sharin ya sai. Aug 27 ya shani gaw Manmaw Sasana ramma lit hkam rai nga ai Wa jau Awng Seng Naw,Mama ni hte Sara/num ni kaw nna ningbaw ningla hpaji (leadership) hpe sharin ya lai wa sai. Aug 28 ya shani gaw Mai Ja yang College kaw na Saranum Kaba Dr.Nangzing Lu Awn woi awn ai Sara/num ni hku nna hpaji hparat a lam Mai Ja Yang kata hpaw da ai College/Dakkasu ni a lam hpe tsun dan mat wa sai. Aug 29 ya shani hta gaw Manmaw KMSS kaw na shinggyim bawngring lam hpe jahpawt daw sharin ya let shana daw hta ya ten byin nga ai COVID 19 ana zinli hte seng nna mare buga hta buga masha ni hpe gara hku woi awn makawp maga la na lam mare masha ni hpe ningmu jahpaw ya na lam ramma ni hta lit la chye na lam hpe  COVID 19 ana zinli ninghkap hpung kaw na sharin bawngban mat wa sai re. Aug 30 ya jahpawt gaw Panghkat ginwang up Wa Jau Paul Lahpai Awng Dang kaw na 6:30am hta ramma hpawng shangut ai chyeju dum Misa nawng ya let 2019/2020 hpaji ladaw hta tsang shi (10) san poi awng ai jawngma (37) hpe kumhpa shagrau ai lamang hpe galaw let ramma hpawng hpe shangut la lu sai lam Loije kaw shanu nga ai Teresa Sumlut Hkawn Bu shiga jaw ai hku nna chye lu ai.