Pakistan Mungdan Hta Hkristian Num Sha Ma Langai Hpe Hkum Shan Roi Lam Galaw Ai Gaw Muslims Ni Re Nga Nna Tsun

Pakistan mungdan hta asak 10 jan re ai Hkristian num sha ma langai hpe hkum shan jawm roi lam galaw ai gaw Muslims ni re nga nna tsun mara shagun lam shiga pru nga ai.

Asak 10 jan re ai shanhte a kasha hpe Muslims marai 5 kaw nna hkum shan jawm roi lam galaw ai mang hkang hpe tara dara ai lam galaw ya na matu Pakistian Mungdan kaw nna matsan mayan re ai Hkristian dinghku langai tsun lajin lam galaw nga ai rai nga ai.

Lai wa sai June shata 9 ya shani kawa shi bungli sa mat ai aten, asak 15 ning sha re ai Maria ngu ai num sha hpe nta kaw nna rim woi mat wa ai. Kasha hpe rim woi mat wa ai ni gaw Muhammad Sajid ngu ai hpaga la the kaga masha marai 4 re, nga nna Kawa kaw nna hpyada dap de sa shawk da ai lam mung galaw da nga ai. “Sinat hte madi nna maw daw ntsa htaw mat wa ai hpe mu dat ai, pya da ni hpe shana ai rai yang ‘mang’ sha wa sa ya na, nga nna tsun jahkrat ai, nga nna mung htingbu ni tsun ai lam nga nga ai. Maria ngu ai num sha hpe gaw June 10 ya shana nta ndaw hta bai wa sa da ya ai, shi grai hkrit kajawng ai masa byin nga ai, nga nna htingbu ni tsun ma ai.

Ndai shiga Pakistan mungdan internet laika man ni hta tsun kajai lam ni brawng pru wa ai hpang, tara tawt lai ai masha ni hpe rim nna ahkyak la ya ai lam galaw ya na matu Hkristian ni kaw nna tsun lajin shamu shamawt ai lam ni galaw wa ma ai.   

Rim roi hkrum ai num ma ni hpe garum lakawn la lam galaw ya nga ai, Legal Evangelical Association Development ngu ai Pakistan Mungdan kata na uhpung tsun ai hta, “2018 ning November shata kaw nna 2019 ning June shata laman rim roi hkrum ai Hkristian num sha ma marai 18 rai sai, nga nna tsun dat ai lam mung nga nga ai lam Ucan shiga dap internet laika man hta ka shana da nga ma ai.

Source : ucannews.com