Pakistan Mungdan, Hka Kaba Tsin-yam Hkrum Ni A Matu Wa Sarabyin Akyu Hpyi Ya

August 28, laban shani, L'Aquila mare kaba, Collemaggio na San Mary Basilica Nawku Htingnu wang kata, Madu Lamu Kasa Akyu Hpyi Ga tsun ten, Wa Sarabyin Francis, sa du lawm ai hpung shaw masha ni hte rau, Pakistan na hka kaba tsin-yam hkrum ni a matu akyu hpyi ya lai wa ai lam chye lu ai.

Dai laban shani, dum nta, tsi-rung, hkyukhtawng ni hta nga nna, online media hku nna shag lawm ai, ni ai, tsan ai, hpung shawa masha ni yawng hpe shakram ga tsun let hka tsin-yam hkrum Pakistan mung shawa masha ni a matu akyu hpyi ya na matu saw shaga da ai.

"Hka tsin-yam hkrum Pakistan masha ni yawng hte ngai nihtep ai hku nga nga ai hpe dum chye shangun mayu nngai; tsin-yam hkrum masha yawng a matu akyu hpyi ya nga nngai; mungdan shagu mung shanhte hpe garum ya na hpe myit mada nngai; shanhte hpe garum shingtau ya ga" nga nna Wa Sarabyin shalan shabran ga hte n-gun jaw saw shaga da ai.

Dingda Asia na mungdan ni hka tsin-yam hkrum Pakistan mung shawa masha ni hpe garum ya na matu Pakistan ni hpyi shawn da ma ai lam mung chye lu ai.

Ndai hka kaba tsin-yam gaw 'Monsson rains' lamu marang kaba nna hka tung kaba wa ai tsin-yam rai nna hka rawt kaba wa ai hte masha hkying (1,000) jan si mat sai lam chye lu ai.

Mun hku re ai masha ni shanhte a dum nta ni hpe tawn kau da nna dingdung Pakistan de hprawng lung wa ma ai lam chye lu ai.

Pakistan mungdan hta, lai wa sai bat ni lapran kaw sha, lamu marang hka kaba tsin-yam a majaw masha wan sumshi (30) a lahta de jam jau nga ai lam mung chye lu ai.

Wa Sarabyin Francis, Madu a lamu kasa akyu hpyi ga tsun ngut ai hpang, Nu Maria gaw Karai Kasang a simsa ngwi pyaw ai lam shinggyim masha ni hta hpyi htinglu htinglai ya nga u ga matu akyu hpyi let hpung shawa masha ni hpe mung Ukraine hte majan tsin-yam hkrum ai ni a matu mung akyu hpyi ya na matu saw shaga da nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-francis-prays-for-flood-hit-pakistan-during-angelus.html