Nuclear Hpe Mai Kaja Ai Lam Hta Jai Lang Ai Masa Byin Hkra Galaw Ga Nga Nna Vatican Tsun

Nuclear n-gun atsam hpe mai kaja ai lam hta asung jashawn jai lang ai masa byin hkra galaw ga nga nna, Mungkan Mungdan ni hte matut mahkai lam hte seng ai Vatican lit hkam Saradaw kaba Paul Richard Gallagher tsun dat nga ai.

Austria Mungdan Vienna hta galaw nga ai Nuclear wan bawm chyam bra wa lam nnga hkra, shakut galaw nga ai “International Atomic Energy Agency” (IAEA) a hkumra hpawng hta shang lawm nga ai  Saradaw kaba Paul Richard Gallagher kaw nna September 16 ya shani lahta na zawn tsun dat ai lam rai nga ai.

Saradaw kaba Gallagher tsun dai hta, “Nuclear wan bawm lak nak ni htuk shapraw ai lam matut nchyam bra wa hkra, nga nga sai wan bawm lak nak ni hpe bai run zing kau lu hkra, Nucleara tsam ning gun ni hpe mai kaja ai lam ni hta simsa ai masa asung jashawn jai lang ai masa byin tai wa hkra ngu ai ban dung du lu na matu gaw

“International Atomic Energy Agency” (IAEA) uhpung galaw shakut nga ai masing masa ni hta grai madung rai nga ai, Vatican hku nna IAEA a magam bungli hpe dingrun madi shadaw nga ai, IAEA kaw nna woi awn ladat shaw ya nga ai Nuclear tsam ning gun ni hpe shinggyim masha ni a rawt jat bawng ring lam, hkamja lam, makau grup yin shingra tara makawp maga lam, malu masha shim lum lam lu la lam hte seng ai hkai lu hkai sha ladat ni hta asung jashawn jai lang ai masa ni gaw matsan jam jau lam kaw na shinggyim masha ni hpe shalawt ya lu ai lam tai lu nga ai zawn mungdan ni a rawt jat bawng ring wa lam ni a matu mung akyu pru ai lam tai lu na rai nga ai”

nga nna Saradaw kaba tsun dat nga ai. 

Iran Mungdan hte Ding Dung Korea Mungdan ni hte seng nna shakut galaw nga ai IAEA a magam bungli masing masa ni hte seng nna mung Vatican kaw nna madi shadaw lawm nga ai hte, Nuclear tsam ning gun hpe lang nna Cancer ana hpe tsi gawn lajang lam ladat awng dang wa hkra shakut lajang nga ai IAEA a masing masa magam bungli ni a majaw mung chyeju dum nga ai, nga nna Saradaw kaba Paul Richard Gallagher tsun dat nga ai lam Vatican shiga dap kaw nna shana dat nga ai.        

Source: Vatican News