Nnang Nawn A Majaw Si Hkala Hkrum Ai Ni A Matu Cardinal Charles Bo Akyu Hpyi Ya

Lai wa sai bat langai ya hte lahkawng ya shani byin lai wa ai, Philippines Mungdan nnang nawn dum a shun ai lam hta si hkala hkrum lai wa sai ni a matu, FABC ngu ai Asia dan Saradaw uhpung rap daw a ning baw Myanmar Mungdan Cardinal Charles Bo kaw nna myit n pyaw yawn hkyen lawm, akyu hpyi ya nga ai lam tsun shana dat nga ai.

Philippines Mungdan Cardinal Luis Tagle hpang de shangun jaw dat ai Cardinal Charles Bo a laika hta, “Masha marai 20 jan si hkrum lam byin shangun ai Phillipines Mungdan na nnang nawn lam shiga hpe na lu ai majaw grai myit n pyaw yawn hkyen lawm nga ai, Sri Lanka Mungdan hta byin lai wa ai bawm kapaw adawt kasat lam a majaw mara kata masha law law asak si hkrum lai wa ai mabyin a majaw yawn hkyen lawm nga ga ai zawn sha, Philippines Mungdan a matu mung yawn hkyen lawm nga ga ai. Asia dan Mungdan shara magup kaw nna Saradaw ni yawng yawn hkyen lawm let, hkala nba hkrum lai wa sai ni a matu akyu hpyi garum ya nga ga ai” nga nna tsun dat nga ai.  

Philippines Mungdan a ka-ang shara, zinlawng langai hta lai wa sai bat lahkawng ya shani n gun 6.4 magnitude daram ja ai nnang nawn dum a shun lai wa ai zawn, bat langai ya shani hta mung, Manila mare daju the Kilometer 400 daram tsan ai Mungdan a dingda sinpraw maga shara hta, n gun 6.1 daram ja ai n nang nawn lam byin lai wa ai majaw Mungdan a mare daju Manila kaw na dum nta wa hpang nkau mi ka-nga shamawt mat wa ai, rai nga ai. Ndai dum a shun lam lahkawng a majaw masha marai 20 jan si hkrum lai wa ma ai hte dum nta ni law law mung hten run lam byin lai wa ai. Wan hkru hkat ai lam ni byin pru wa na tsang ai majaw dai ginra shara ni hta ya du hkra mi hprap wan ni yawng hpe mung naw dawm da ya ai lam chye lu ai.

Source:Vatican News