Nnang nawn dum ashun tsin yam hkrum masha ni a matu akyu hpyi ya lam Philippines Nawku hpung galaw ya ai shiga. (30 Oct, 2019)

Nnang nawn dum ashun tsin yam hkrum masha ni a matu akyu hpyi ya lam Philippines Nawku hpung galaw ya ai shiga

Lai wa sai bat lahkawng Oct 29 ya shani, Phippines mungdan dingda maga daw hta byin lai wa ai grai n gun kaba ai Nnang nawn dum ashun lam a majaw tsin yam hkrum nga ai tsin yam hkrum masha ni yawng hte rau myit hpawm nga ai, nga nna Philippines mungdan saradaw ni kaw nna tsun shapraw dat nga ma ai.

Philippines mungdan Kahtawlik nawku hpung saradaw uhpung rap daw ningbaw saradaw kaba Romulo Valles ta masat htu nna ndau shapraw dat ai ndau laika hta, “si hkala hkrum lai wa sai ni yawng a matu akyu hpyi ya nga ga ai, hpung masha ni yawng hku nna mung nnang nawn lam a majaw hkrit kajawng hkrum nga ai ni yawng a matu akyu hpyi ya nga ga, lani mung jang sha n gun kaba ai nnang nawn kaba 2 lang kahtap byin ngut ai hpang shara nkau ni hta matut shamawt ai lam ni mung naw byin nga ai majaw hkrit kajawng let maja nna shanu nga ra ma ai shanhte a matu akyu hpyi ya nga ga, ndai zawn yak hkyak tsin yam hkrum nga ga ai aten myit tsang ai myit ni hte shada da akyu hpyi hkat, garum lakawn la hkat ai lam ni galaw nga ga,” nga nna saradaw ni a ndau laika hta tsun dat nga ai.

Philippines mungda a dingda maga Midanao ngu ai ginwang de October 29 ya jahpawt nnang nawn shadaw shadang n gun 6.6 daram ja ai dum ashun lam byin lai wa ai majaw nlaw htum masha marai 6 si hkrum lai wa sai. De a shawng na bat hta sha mung ndai ginra hta sha nnang nawn kaba byin nna masha marai 7 si hkrum lai wa ai shara rai nga ai. Nawku jawng ni hte dum nta ni hten za lam ni mung nga nga ai, nga ai shiga ni mung pru nga ai.

Manila saradaw kaba Cardinal  Luis Antonio Tagle hku nna mung, “nan bat langai shawng nnan hku nna yawng hpe lajin dat mayu ai lam gaw nnang nawn duma shun ai lam a majaw tsin yam hkrum nga ai anhte a hpu nau ni yawng a matu Madu Karai kasang kaw akyu hpyi garum ya ga ngu ai lam lajin mayu nngai” nga nna Radio Veritas kaw nna nadau lajin ai lam galaw dat nga ai, nga nna CBCP Philippines mungdan Kahtawli saradaw uhpung rapdaw shiga dap kaw nna shana da nga ai.        

 http://cbcpnews.net/cbcpnews/church-offers-prayers-for-quake-victims/