Nju ndawng ai ngu ai lam gaw, masha asak sat ai ngu ai tara tawt lai ai masa du shangun ai nam bat langai ngu na tsang ning gam rai nga ai nga nna Wa Sarabyin tsun

“Kaga masha ni a prat hpe nkaw nlaw di ai, aroi ara ngu nna tsun kau ai lam ni gaw dai masha ni a prat hpe sat kau ai maga de du mat wa shangun ai nam bat langai ngu na tsang ning gam ni rai nga ai,” nga nna Wa Sarabyin Francis tsun dat nga ai.

October 17,2018  lai wa sai bat masum ya shani San Peter pa kaba hta hpawng nga ai shawa hpawng hpe, Tara kanu lam (10) hta na nam bat manga ngu na Tara Kanu rai nga ai, “masha hkum sat” ngu ai tara lam hte seng nna sharin shaga ai hta lahta na zawn Wa Sarabyin Francis tsun lai wa ai lam rai nga ai.  

Wa Sarabyin tsun ai hta, “tinang a hpu nau wa hpe nju ndawng ai, sin dawng katawt ai wa kadai raitim, je yang ai hkrum gying nga ai, nga nna madu yesu tsun ai, nju ndawng ai lam ngu ai hte masha sat ai ngu ai lam hpe maren re ngu ai masa madu yesu tsun sharin ai, kaga masha ni a parat hpe aroi ara ngu nna tsun kau ai lam gaw sat ai lam rai nga ai, ntsawra ai ngu ai lam gaw masha sat ai lam a nam bat langai ngu na tsag ning gam rai nga ai, Hkristian ni hku nna myit htingram la chye ai myit masa rawng nga ra ga ai raitim, Missa hkungga nawng ya na matu, la nga ga ai aten ni hta pyi shatan n-hkan ga tsun mayu ai, kaga masha ni a n-kaja ai lam ni hpe tsun shatan ai lam ni galaw mayu nga ga ai rai nga ai., n-dai gaw nbyin gying ai lam nan rai nga ai.

Nju ndawng ai lam ngu ai gaw hkrit tsang hpa lam kaba re, kaga masha ni hpe aroi ara ngu tsun ai lam, kaga masha ni hpe nkaw nlaw di ai lam ni gaw kade sawang ai nkaja ai lam ni re ngu ai hpe myit dum mai nga ga ai. Nju ndawng, nkaw nlaw di ai lam hte masha sat ai lam ngu ai lam gaw hpan langai sha re, ngu nna madu yesu masat da nga ai. Mara kata ma kaji langai hpe tsun dat ai nhtap htuk ai ga hkaw mi gaw dai ma hpe hkra machyi shangun lu nga ai, num ma langai a man hta di dan ai n gawn nsawn re ai shamu shamawt lam langai gaw dai num ma hpe hkra machyi shangun lu nga ai, ramma langai hpe shi a ntsa kam hpa lam nnga ai ngu ai masa galaw dat ai gaw dai ramma a prat hpe jahten kau ya lu nga ai, masha langai hpe hpa nsawn ya ai, nsu n nawn galaw kau ai ngu ai lam gaw dai masha wa a prat hpe jahten sharun kau ya ai lam nan tai nga ai” nga nna Wa Sarabyin hkaw tsun lai wa ai lam CNS Vaticans shiga dap internet laika man hta ka shana dat nga ai.    

Source : CNS (Catholic News Service )