Ningnan Galai Shai Na Matu Wa Sarabyin Francis Saw Shaga Ai Hpe Canada Sasana Jau Hkap La

July 29, bat manga ya shani, Wa Sarabyin Francis, Nawku Hpung gaw tsi shamai ya nna ningnan galai shai ya na lam hta rai nga ra ai ngu Saradaw, Jau, Sasana magam gun ni hpe mungga shaga da ai hpe Canada Sasana Jau, Edward Shatov madi shadaw hkap la ai lam tsun da nga ai.

Canada na Saradaw, Jau, Sasana magam gun ni hte Sagu Hpung woi ni, Notre-Dame de Quebe Cathedral-Basilica Nawku Htingnu Kaba hta shana daw maga na akyu hpyi ga rau jawm tsun ai aten hta, Wa Sarabyin, mungga hte shadum saw shaga da ai rai nga ai.

Sagu hpung woi ni hte Nawku Hpung ningbaw hpa-awn ni gaw, shanhte a sagu rem magam galaw let, hpu nau myit majing hte hku hkau kanawn mazum tsun shaga, lailen madun let, Madu Hkristu hpe sakse hkam nna, Shi hpe chye chyang hkau chyap wa mu ga hte kam hpa kam shamyit wa mu ga matu kasi tai, sakse ni rai nga mu, ngu Wa Sarabyin Francis mungga htawn da ai rai nga ai.

Hkristan ni gaw Madu Yesu hpe ndau shana ya ra ai; masha hkum shagu hpe Karai Kasang ahkyak la hkye hkrang la hpe hkap la hkam la na hkraw ya na matu sakse ni tai ra ai; Yawhan a Kabu Gara Shiga hta rawng ai hte maren, Madu Yesu a sape kaja ni tai lu hkra nau na myit majing rawng ai prat hpe madu da lu ai ni rai nga ra ai; Ndai ahkyak ai lam masum hte seng nna Wa Sarabyin sagu rem Jau hpung ni hpe myit hprang shangun ai rai nga ai, ngu Wa Jau Shatov sang lang da ai.

Karai Kasang gaw mai kaja ai wa mung rai, tsawm sari rawng ai wa mung rai nga ai.

Ndai ahkyak ai lam masum hpe hkan shatup lu na matu gaw sagu rem ni hte sagu hpung masha ni yawng, Missa Hkungga nawng jau ai hta akyu hpyi let shang lawm ra ga ai, ngu mung matut tsun da ai.

Wa Sarabyin Francis Canada mungdan de, “penitential pilgrimage” myit malai buhkawm akyu hpyi magam galaw woi na matu sa du ai gaw Canada buga masha ni hte nihtep ai lam madun ai rai nga ai; Lai wa sai aten ni hta yak hkak jam jau, nni nkri lam ni hte seng ai mahkrum madup nga lai wa ai buga masha ni, Karai Kasang a mara dat hkyamsa hkam la, tsi tsi shamai shatsai hkam la, prinem htingram lam lu la mu ga matu sa du ai rai nga ai.

Wa Sarabyin francis Canada de sa du ai gaw buga masha ni, myit masin ningnan hte lahkam ningnan htawt hkawm hpang na matu rai nga ai, ngu mung Wa Jau Shatov, shi a ningmu hpe tsun shapraw da ai.

Wa Sarabyin Francis a ndai hkrun lam gaw buga masha ni lai wa sai aten na machyi hkra lai wa sai ana ni hpe tsi tsi hkam la lu na hte du wa na aten ni hta myit masin ningnan, lahkam ningnan hkam sa lu na matu rai nga ai, ngu Wa Jau tsun da ai.

“Ningnan re ai galai shai shatsawm sa wa ai lam hta kabu pyaw ai myit masin hte sak hkrung sa wa na matu Wa sarabyin Francis anhte hpe tsun ai rai nga ai, ngu Wa Jau Shatov, ginchyum ga hte shi a hkam la lu ai hpe garan kachyan da nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-07/missionary-shatov-pope-penitential-pilgrimage-indigenous-people.html