Nhkum Zup Ai Ramma Ni Marai ( 11 ) Chyoipra Hkum Nnan Hkam La Lu

December 3, 2022

Dai ni gaw Mungkan hta Nhkum zup ai masha ni a matu masat da ai nhtoi rai nga ai. Nhkum zup ai masha ni a nhtoi masat hku nna Edin Jau Ginwang hta myit hkamja lam hta n hkum zup ai, ga n shaga ai hte Na nna ai ramma ni marai ( 11 ) hpe shawng ningnan chyoipra hkum jaw ai lam galaw ai.

Ramma ni hpe tara laika sharin ai lam hpe lai wa sai October shata kaw nna Columban Mama Enda hte rau Myit hkam ja lam hta nhkum zup ai ma ni hpe sharin jaw ai Saranum ni hku nna garum ya wa sai. Ramma ni gaw tinang a kanu kawa ni hte rau sha tsawm dik ai palawng ni hpung let sa du shang lawm ma ai.

Daini chyoipra hkum nnan hkam la lu sai ramma ni gaw

1. Shd. Augustine Lahpai Naw Lawn ( Edin Jau ginwang )

2. Shy. Christina Marip Ja Tsawm Pan ( Edin Jau ginwang )

3. Shy. Rosy Zin Wa Htu Sam ( Edin jau ginwang )

4. Shd. Sylvester Mwi La Hkawng ( Edin Jau ginwang )

5. Shy. Bernadette Laja Bawk Htoi Awng ( Pa La Na jau ginwang )

6. Shy. Cicilia Ja Noi Lu ( Pa La Na jau ginwang )

7. Shy. Cicilia Ja Lawt Mai ( Alam jau ginwang )

8. Shy. Tresa N Hkum Nang Bu ( Alam jau ginwang )

9. Shd. Luka Sharoi Seng Tu Awng ( Myo Thit Gyi jau ginwang )

10. Shd. Patrick Ja Wa Naw Awng Mai ( Shatapru jau ginwang )

11. Shd. Paulu Pung Sau Myu Law Awng ( Myitkyina jau ginwang )

na ramma ni rai nga ma ai.

Missa hkungga hpe Columban jau Myo Jat Awng ( Fr.Kurt Zion Pala, SSC ) nawng jau ya ai.

Shawng ning nan Chyoi pra hkum hpe hkam la lu na matu ahkaw ahkang jaw ya sai Jau Gingwang shagu na Ginwang up Jau ni hpe mung chyeju dum ai lam woi awn galaw ai ni tsun dat nga ai.

Myit hkamja lam hta n hkum zup ai, lagaw lata n kung kyang ai, na nna rai nna n hkum n zup re ai ma ni a matu  Pa La Na kaw hpaw tawn da ai Clay Center n pu hta Columban Mama ni woi awn nna hpaji jawng hpaw tawn da ya ai rai nga ai. Ya ten jawng ma ni marai ( 42 ) sa du hpaji sharin hkaja la taw ai lam chye lu ai. Jawng lung mayu ai ma ni nga ai rai yang Pa La Na Clay center jawng kaw sa du matut mahkai galaw la mai nga ai.

Shiga - Julia Ja Ing