Nawku Hpung Shiga ( Church News ) 28 Oct, 2019

Amezon ginra hte seng ai saradaw ni a zup hpawng kaba hpe Oct 26 ya shani shangut ginchyum dat sai shiga

Amezon ginra hte seng ai saradaw ni a zup hpawng kaba hpe Oct 26 ya shani shangut ginchyum dat sai rai nga ai. Synod zup hpawng kaba shangut gin chyum dat ai hpawng hta Wa sarabyin Francis hkum nan sa du shang lawm nna, “awng dang lam hpe anhte yawng lu la saga ai” nga nna tsun lai wa ai. Htung hkying lai htung masa, makau grup yin shingra tara masa, shinggyim nga pra masa, nawku hpung a sasana magam bungli masa ngu ai ning mu myi jut hpan mali hku nna bawng ban tsun shaga ai lam ni synod zup hpawng kaba laman galaw lai wa ga ai, nga nna mung Wa sarabyin tsun dat nga ai.

Yawng myit hkrum shagrin da sai zup hpawng kaba a daw dan myit hkrum ga shaka lam ni hpe mung hti shana ndau ai lam ni galaw lai wa ma ai.

Myit hkrum daw dan da sai lam ni hte seng nna ntsa lam tsun sang lam wa sarabyin tsun ai hta, “gram lajang sharai la lam ngu ai nawku hpung hta galaoi mung nga ra nga ai, zup hpawng kaba laman bawng ban tsun shaga ai lam ni hta mung jau ni hpe shapan shalat ai magam lam hta gram lajang sharai la ra ai lam ni nga nga ai ngu ai lam ni pru wa ai. Amezon gina buga hta na jau ni law law America mungdan hte Uropa dan mungdan ni hkan sasana bungli sa galaw nga ai ni law law nga ma ai, nkau jau ni gaw kaga mungdan ni de hpaji matut sharin hkaja na matu pru sa nna, hpaji sharit la ngut ai hpang tinang a buga Amezon de bai nwa ai sha dai mungdan ni hta shanu nga mat ai, nga nna tsun ai lam ni mung nga nga ai. ‘nkau jau ni gaw sasana galaw na matu bum ga tsaw tsan ai shara de bai ginhtang wa nkam ma ai’ nga nna Italy mungdan na saradaw langai tsun ai lam mung nga nga ai, ndai zawn re ai masa gaw nbyin gying ai lam re, myit kataw shangun ai lam ni rai nga ai, sasana magam hta sharawng shara n gun dat shakut mayu ai jau ni hpe shapan shalat ai masa byin tai hkra gram lai sharai ai lam ni galaw ra na re” nga nna wa sarabyin tsun dat nga ai.

Amyu shayi num sha ni hte seng nna Wa sarabyin tsun ai hta gaw, “Amyu shayi num ni hte seng nna nawku hpung kata shanhte a magam lit lamang ni hte seng nna mung zup hpawng kaba daw dan matsun laika hta ka shalawm da ai lam ni lawm nga ai. Ndai lam hte seng nna kadut mi tsun mayu ai gaw, nawku hpung kata hta amyu shayi num ni a lam hte seng nna tsun shaga lam ni galaw ga ai shaloi, shanhte a magam bungli lam ni hte seng nna chyu sha tsun shaga mu mada ai masa anhte galaw chye ga ai, hkrak nga yang nawku hpung kata amyu shayi num sha  ni a lit lamang gaw magam bungli ngu ai hta grau nna dam lada kaba nga ai” nga nna Wa sarabyin tsun lai wa ai.

Ya ndai Synod zup hpawng kaba a myit hkrum daw dan lam ni hte lakap nna Nawku hpung a sharin matsun ndau laika hpe Wa sarabyin kaw nna ndai shaning garai nhtum shi yang ndau shapraw lam galaw na, dai shaloi she nawku hpung ting kaw nna hkan sa ra ai sharin matsun tai wa na re, nga nna Wa sarabyin tsun dat nga ai lam Vatican shiga dap kaw nna shana dat nga ai.