Nawku Hpung Shiga ( Church News ) 12 May 2020

Ireland mungdan, Dublin Mare kaw na mawdaw jahkring sara ni hta mara raw sacramentu chyeju kumla jaw ya na matu  Jau ni maraw dung ya nga ma ai shi ga.

COVID – 19 makawp maga lam matsun hta masha shada pe 3 kaw na pe 6 gang nna nga ra na lam rai nga ai. Ireland mungdan Bulin na Jau langai mi shi a mawdaw jahkring da ai shara hta mara raw dung ya nga ai sumla gaw masha wuhpung wuhpawng shiga hta chyam bra mying dan hkrung nga ai rai nga ai. Dai Jau a mying gaw Jau Pet re ai da.Shi hte Jau kaga ni mung lani myi hta lahkawng lang mara raw dung ya nga ma ai. Mara raw dung shagu mara raw chyeju kumla hkam la ai hpung masha hte pe 3 gang ai kaw na mara raw ya nga ma ai. Ana zingli dai daram jahkrit shama taw nga ai raitim, tinang asak hpe ntau ai sha sagu hpung masha ni a matu sagu rem wa magam hpe kangka gun hpai ai sha n ga, tinang a asak hpe galai nna yu lakawn taw nga ai majaw shinggyim hpawng ni hta shakawn nma rai nga ai. 

Dai zawn tinang a sagu hpung hpe yu lakawn taw nga ai sasana gaw San Mark sasana rai nna, dai sasana gaw Dublin muklung a dingdung maga na Tarlat muklung hta rai nga ai.  Dai zawn galaw ai gaw laklai ai lam gaw nrai nga ai. Jau ni a magam hpe galaw jahkum shatsup ai lam rai nga ai. Laklai ai lam nre ai sha, galai shai taw nga ai gaw nawku jawng kata nre ai, dam pa ai mawdaw jahkring da shara ni hta bying taw nga ai majaw rai nga ai. Mara raw dung ai hpe ndai zawn galaw ra ai lachyum nga nga ai. Covid -19 nchyam bra u ga matu matsun lam hte maren hkan galaw lu ai. Dai hta grau nna mu chye shangun ai gaw nawku jawng gaw nawku nta kata kaw sha n ga, ndai shara hta mung rai nga ai ngu ai hpe shadum ai lam rai nga ai.

Dai zawn mara raw dung ya ai hta hpung masha ni langai lahkawng sha sa hkam la na re ngu htang let hti na matu laika buk ni lawm sa ma ai. Raitim, tatut hta lawm sa wa ai laika buk hpaw na aten pyi nnga hkra mara raw chyeju kumla hkam ya ra nga ma ai. Mara raw sacramentu hkam la ngut ai hpang kalang bai sa hkam ai masha ni mung nga nga ai zawn mara raw mayu ai myit rawng wa ai majaw mara sa raw ai masha ni mung nga ma ai. Dai majaw grai myit dik ai; ya na zawn ana zingli tsin-yam hkrum sha nga ai ten shakut nna mara raw sacramentu chyeju kumla hkam la mayu ai ni hpe mahkrun lam jaw ai hte seng nna mara shagun mara mu ai hta kaja ai hku mu mada ma ai hpe shinggyim wuhpung ni hta, shiga laika ni hta, shi ga htawn nbung lam ni hta bai na chye lu ai. Kaga mungdan ni zawn tinang dum nta wang shinggan nmai le ai tara jahkrat da ai ten kaw na Ireland mungdan na nawku jawng ni hta nawku daw jau lam ni hpe pat da sai rai nga ai.

Nawku daw jau lam hpe n gawlaw lu ai majaw myit prwi hkrat ai hpung masha ni nga ma ai. Jau langai hku na tinang hpung masha ni hte rau alum ala rai misa hkungga nawng jau lai wa ai rai nna, ya hpung masha ni nlawm ai misa hkungga nawng jaw taw nga ra ai. Dai majaw Jau langai mi hku nna, hpung masha ni lawm ai misa hkungga hpe bai nawng jau mayu wa ai myit rawng wa chye na hte hpung masha ni mung nawku daw jau lamang ni hta myit grau sharawng wa chye na matu galai shai ai lam ni galaw ra nga ai. Ndai masa ni a majaw hpung lam sacramentu chyeju kumla ni hte tsan gang mat ai hpung masha ni Karai chyeju shingnyip de shingbyin shang wa ma mahkrum madup hpe mung hkrum sha lai wa ai lam tsun da nga ai.

Ka Lajang Ai – Wa Jau Patrick Gaw Maw Hkawng Yae