Nawku Hpung Kata Num La Roi Rip Ai Yawng Gaw Grai Zai Grai N Hkru Ai Lam Re nga Wa Sarabyin tsun dat ai shiga

September 5, bat langai ya shana daw maga, CNN (the cable news network) Portugal Shiga Dap hte hkrum shaga ai lamang hta, Wa Sarabyin Francis, Nawku Hpung kata, arawng aya, ahkang aya kaba ai num/la ni a rip rip ai hpe hkrum sha machyi hkram sha ai ni law law nga nga ai, nga nna tsun shapraw dan wa ai lam Vatican Shiga Dap kaw nna September 6 ya shani ndau shana da ma ai.

Ndai gaw "World Youth Day hte Synod hpawng kaba ni hte seng nna hkrum shaga ai lamang hta Wa Sarabyin Francis tsun shalawm sadi jaw da ai rai nga ai.

Jau ni kaga masha ni hpe roi rip ai gaw Nawku Hpung kawn hkam sharang ya ai lam kachyi mi pyi n mai galaw ai, "zero tolerance" nan rai ra ai, nga nna CNN Portugal Shiga Dap hte hkrum shaga ai hta Wa Sarabyin Francis kahtap kahtap nna tsun shadum da nga ai.

"Ndai lam hte seng nna ngai asan sha galaw kau mayu ai: nawku hpung woi ai num/la ni a roi rip ai, arawng aya kaba ai ni a roi rip ai, hkum shan sai hte seng nna roi rip ai lam gaw grai zai, grai n hkru ai re. Hpa majaw nga yang, nawku hpung woi num/la yawng: Jau ni, Sasana Jau, Deacon, MaMa, Brother ni, Tara hkaw sara ni, hpung masha ni hta na num/la ni, ndai ni yawng gaw rau sha ginlum kahkyin gumding wa na hpe gaw gap ai hta daw jau ai ni rai ra ai, Nawku Hpung, wuhpung wuhpawng rawt jat galu kaba bawng ring wa na matu daw jau ai ni rai ra ai. Shanhte gaw roi rip ai lam hpe n mai galaw ai, jahten sharun ai lam hpe n mai galaw ai," nga nna, Wa Sarabyin Francis, sharin shaga shadum sadi jaw da ai.

"Roi rip ai lam gaw aten shagu, prat shagu, byin nga ai yawn hpa, myit n pyaw hpa langai rai nga ai; anhte a prat hta mung byin nga ai," nga nna mung myit grai n pyaw let Wa Sarabyin matut tsun ai.

Roi rip ai lam law malawng gaw kun dinghku nta masha ni lapran hte htingbu ni a lapran, byin ai; ginsup hpan hkum sum hpa hta, club ni hta, hpaji jawng ni hta mung law law byin ai. Nawku Hpung kata byin ai lam gade mi n law la ai tsa shadang sha rai nga tim, roi rip ai lam langai sha raitim, dai gaw grai zai grai nhkru ai re, nga nna mung tsun shadum da ai.

Prat hta hkan nna kaja wa byin nga ai roi rip ai lam ni hpe ahkyak la hparan sa wa ra ai lam mung Wa Sarabyin madi madun d ai.

Mungkan Ramma Nhtoi (World Youth Day)

2023 shaning na Mungkan ramma nhtoi hpe Portugal mungdan, Lisbon hta galaw na matu masat shagrin da sai hte maren mungkan shara shagu na ramma ni sa du shang lawm na rai ma ai; Shanhte hpe n-gun jaw garum shingtau ya ra ai; Shanhte a shawng lam a matu ra kadawng ra ahkyak ai n-gun atsam nga hkra shanhte hpe n-gun jaw lam madun ya ra ai, nga nna mung Mungkan Ramma Nhtoi hte seng nna Wa Sarabyin Francis shadum da ai.

Ramma ni chye na hkap la ai n sen hte shanhte ramma ni a kung lailen hte maren hkawm sa lu na matu garum ya ra ai; Shanhte a nsen hpe mung madat ya ra ai; shaloi shanhte a mahkrum madup hte chye na hkap la ai masa lam hta shanhte hkawm sa lu na matu, shani shagu nawku daw jau hkrang hte maren nawku daw jau woi ra ai, nga nna mung Wa Sarabyin Francis matsun da ai. Rosary hti ai, chyum laika ni hpe myit sumru let akyu hpyi ai. Shi hkum hpe Karai Kasang a man e nga nga let Karai Kasang kaw na shadum jahprang nsen, sharin shaga nsen, shalan shabran ya ai nsen ni hpe, Wa Sarabyin, shi hkum nan mung hkam la ai rai nga ai.

Ndai masa hte akyu hpyi ai rai yang Karai Kasang gaw anhte a akyu hpyi nsen hpe madat ya let myi hpaw na na shangun ya na ra ai.

Hkrum shaga mung jahta ai (Dialogue) mung ahkyak kaba langai rai nga ai. Daini prat hta byin nga ai majan lam ni hte seng ai hpe shada hkrum shaga prinem htingram lam la ra ai; Ga shadawn, Ukraine hte Russia mungdan lahkawng yan na mungdan gumsan magam yan shada hkrum shaga ai hpe galaw ra ai; Prinem htingram lam hpe la ra ai, nga nna mung ga shadawn hte shadum jahprang da ai.

Anhte rau rai ga ai rai yang, lama ma hpe gaw galaw shatup lu ai, nga nna n-gun jaw da ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-09/pope-francis-abuse-by-men-and-women-in-the-church-is-diabolical.html

Add new comment

11 + 2 =