Nawku Hpung Kata Dau Jau Na Lam Hte Seng Nna, Wa Sarabyin Francis Saradaw Ni Hpe Man Hkrum Hkrum Shaga Na Matu Saw Shaga Da

(50) lang ngu na Wa Sarabyin Paulu VI a motu proprio "Ministeria quaedam" hte seng nna Wa Sarabyin Francis, nawku hpung kata daw jau na lam hte seng nna, Wa Saradaw ni hpe man hkrum hkrum shaga na matu saw shaga da ai hpe, August 24 ya shani, Vatican Shiga Dap kaw nna ndau da ya ma ai.

Wa Sarabyin Paulu VI a motu proprio "Ministeria quaedam" ga baw hte laika htuk shapraw ai manga shi ning hpring lai wa sai rai nna, ndai ga baw hte seng nna sumru dinglik na matu Wa Sarabyin Francis, Wa Saradaw ni hpe saw shaga da ai rai nga ai.

"Minor orders" ni rai nga ai "lectors" mungga hti ai hta daw jau ai, "Acolyte" nawku tawn hta daw jau na lam ni hte seng ai ni mung lawm ai rai nga ai.

Wa Sarabyin Francis tsun ai Wa Sarabyin Paulu VI a mahkrun lam

Wa Sarabyin Paulu VI a Mutu Proprio ga baw hte re ai matsun ai lam gaw "minor orders" ngu ai daw jau magam kaji ni hte seng ai n rai nga ai; Nawku hpung hta dam lada, ahkyak ai daw jau lam ni rai nga ai, ngu Wa Sarabyin Francis madi shadaw madi madun da nga ai.

Wa Sarabyin Francis hkum nan "Apostolic Letters" matsun laika prat masa hta hkan nna matsun laika lahkawn ka shapraw lai wa sai rai nga ai.

Langai gaw "Spiritus Domini" ngu a ga baw hte 2021 January 10 shani shapraw lai wa ai. Dai gaw myu shayi ni "tectorate" ngu ai chyum laika hti ai hta shang lawm mai ai lam hte "Acolytate Ministries" ngu ai nawku tawn hta daw jau ai magam hta mung shang lawm mai ai lam rai nga ai.

Lahkawng gaw "Antiquum ministerum" ngu ai ga baw hte 2021 May 10 ya shani shapraw lai wa ai. Dai gaw Tara hkaw sara ni a nawku daw jau magam hta shang lawm dau jau mai ai lam rai nga ai.

Ndai matsun laika hte maren nawku hpung hta tara ai, ahkaw ahkang hte hkrak galaw woi awn nga ai rai nga ai.

Ndai shatsawm jahtuk ai lam gaw shawg na nawku hpung a sharin shaga ai "doctrine" hpe galai kau ai gaw n rai nga ai. Rai ti mung, prat masa hta hkan nna jahpring jahtuk la ai mahtang she rai nga ai, nga nna Wa Sarabyin Francis tsun shadum da nga ai.

Ndai zawn Wa Sarabyin Paulu VI masing jahkrat galaw woi awn lai wa ai gaw Hkristan wuhpung kata, prat masa hta hkan nna masan grau sa, grau dam lada ai hku Nawku Hpung kata dau jau lu na matu yaw shada ai rai nga ai, nga nna mung Wa Sarabyin Francis matut tsun sang lang da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/church-ministries-fifty-years-pope-francis-message-ministeria-qu.html